УИХ-ын гишүүн Н.Номтойбаяраас Засгийн газрыг байгуулах зөвшилцлийн ажлын хэсгийн хэлэлцээрүүд аль шатандаа явж буй талаар тодрууллаа.
-- Засгийн газрыг байгуулах АН, МАН-ын зөвшилцлийн ажлын хэсгийн хэлцэл ямар шатандаа явна вэ. Яамдууд хэд байх вэ гэдэг асуудлаар зөрөлдөж байгаа гэсэн?
- Бүтэц бүрэлдэхүүнтэй холбоотой зөрчил үүссэн. Эрх баригчид яамдынхаа тоог нэмэх, бидний зүгээс цөөлөх зарчим баримталж зөрчилтэй асуудал үүссэн. Яамдынхаа тоог 100 хувь өнөөдрийн байгаа жишигт нийцүүлнэ. Үнэхээр хямралыг хамтдаа даван туулъя гэсэн бол төсвийн урсгал зардлаа бууруулъя гэдэгт санал нэгдсэн.
-Танай намаас хэдэн яамыг санал болгож байгаа вэ?
-Манайх 13 яам, Шадар сайд, Ерөнхий сайд, ЗГХЭГ-ын дарга гээд нийт 16 сайдтай байхаар ярьсан. Гэтэл АН-аас 16 сайд, дээр гурван сайдаа нэмээд 19 сайдтай байхаар яриа тохироо хийе гэсэн юм. Гэхдээ дотор нь задаргаа хийх талаар санал оруулсан. Жишээлбэл, Соёл спорт аялал жуулчлалыг бусад яамдуудад хуваах зэргээр шаардлага тавьж байгаа. Зөвшилцлийн ажлын хэсэг дээр МАН өнгөрсөн хоёр жилд тавьж байсан шаардлагаа л тавьж байна гэж ойлгож болно.
-Зөвшилцөл зогссон гэсэн үг үү?
-Тийм. Өнөөдөр үргэлжлээд явах байх аа.
-Шадар сайд хоёр байх ёстой гэж танайхаас оруулж ирсэн үү?
-Үгүй. Манайхаас нэг байх ёстой гэдэг шаардлага тавьсан. ямар нэг бүлэг фракци, нам эвсэлд зориулж албан тушаал нэмж болохгүй.
-Дэд сайдаа ямар байдлаар хуваарилах вэ?
-Дэд сайдыг яриагүй байна. Гэхдээ яамдаа хуваагаад авчихсан тохиолдолд дэд сайдаа сөөлжүүлж тавина. АН-аас сайд байгаа газар МАН-аас дэд сайд очих байдлаар явна.
-Парламентад байгаа суудлынхаа тоогоор сайдаа хуваана гэж яригдсан гэсэн. Тэгэхээр нэмэхгүй л бол энэ олон намд сайдын суудал хүрэхгүй байгаа юм биш үү?
-Миний яриад байгаа зарчим тэр. Фракцийн эрх ашигт хөтлөгдөж яам нэмнэ гэдэг чинь өөрөө маш зарчимгүй асуудал. Суудал эзэлж байгаа гэж үзвэл бие даагчдыг хасаад 73 гишүүнд хуваагдана. Нэг сайдыг 4.5 хувьтай гэж үзье. Тэгэхээр 16 дотор 8, 6, 2 гэсэн тоо бууж байгаа юм. 73-ыг 16-д хуваагаад 4.56 байгаа. АН 7.5-аас дээш, манайх 5.7, "Шударга ёс" эвсэл 2.4. Тэгэхээр 8, 6, 2 л гэсэн хувилбар байгаа.
-ИЗНН-д суудал очихгүй гэсэн үг үү?
-ИЗНН бол үндсэндээ хоёрхон суудалтай, бүлэг ч байхгүй нам. ИЗНН-ын 0.46 гарч байгаа. Нэг сайдын тал ч хүрэхгүй. Эрх баригчид энэ асуудлаа зохицуулах байлгүй дээ. Бид санаа тавиад байх асуудал биш.
-Нэр бүхий гишүүд өчигдөр зөвшилцлийн хурлыг орхиж гарсан гэсэн. Үнэн үү?
-Яамдын тоон хуваарилалт ерөөсөө явагдаагүй. Би орхиж гарсан. Ё.Отгонбаяр гишүүн бас орхиж гарсан. Манайх бүлгийн шийдвэрээ танилцуулсан. Өөр асуудлыг ярилцах шаардлагагүй гэж үзсэн. Бүлгийн байр суурь хатуу байгаа.
-Түр Засгийн газар байгуулж болохгүй юм уу?
-1.6 жилийн дараа сонгууль болно. Богино хугацаанд хамтарсан тохиолдолд юу хийж бүтээх вэ гэдгээ ярилцана. Эдийн засгийн дунд хугацааны хөтөлбөр хэрэгжүүлнэ. эрчимжсэн төлөвлөгөө хэрэгжүүлж, том төсөл хөтөлбөрийн суурийг тавьж, бодлогын хувьд эхлүүлнэ. МАН хамтарч ажиллахдаа эдийн засгийн хүрээнд юу хийх вэ гэдгийг бүлэг дээр асууж, МАН хамтрахдаа хөдөө аж ахуйн салбараа онцлон дэмжинэ гэсэн хариулт авсан.
Т.Энхэлээ
Сэтгэгдэл (7)