Сүүлийн хэдэн өдрүүдэд шинэ Засгийн газрыг байгуулахаар Ардчилсан нам болон МАН-ын ажлын хэсгүүд зөвшилцөх асуудлаар хараахан шийдэлд хүрч чадахгүй байсан юм. Учир нь Засгийн газрын бүтэц бүрэлдэхүүний хуваарилалт дээр тохирч чадахгүй байлаа. Өчигдөр болсон ажлын хэсгүүдийн уулзалтын дараа МАН-ынхан “Зөвшилцөх асуудал мухардалд орлоо” гэж мэдэгдсэн. Харин өнөөдөр үдээс хойш хуралдаж эхлэсэн хоёр намын ажлын хэсгийнхэн “Шийдэл”-ийн Засгийн газрыг нийт 15 яамтай, 19 сайтай байгуулахаар үндсэндээ тохирлоо гэж эх сурвалжууд мэдээллээ.
                    Яг одоо ажлын хэсэг үргэлжлүүлэн хуралдаж энэхүү шийдвэрээ эцэслэх гэж байна.  Сайд нарын хуваарилалтын хувьд АН 10 сайд, МАН 6 сайд, “Шударга ёс” эвслийн бүлэг нийтдээ гурван сайдын суудал авахаар болжээ. Шинэ засгийн газрын бүтэц урьдчилан таамаглаж байснаар Ерөнхий сайд, Тэргүүн Шадар сайд, Шадар сайд, ЗГХЭГ-ын дарга буюу Монголын Улсын Сайд, 15 яамны сайд гэсэн бүтэцтэйгээр ирэх жил гаруй хугацаанд ажиллахаар боллоо. Өнөөдөр ажлын хэсгүүд зөвшилцлөө эцэслэж чадвал маргааш өглөө Ерөнхий сайд Ч.Сайханбилэг УИХ-д бүтэц бүрэлдэхүүнээ өргөн барьж батлуулах ажилдаа орно.