Засгийн газрын шинэ бүтцийн талаар УИХ дахь МАХН-МҮАН-ын "Шударга ёс" эвслийн бүлгийн ахлагч Н.Батцэрэг байр сууриа илэрхийллээ.

Тэрбээр "Тус хуулийг өргөн барихын өмнө “За одоо болж байна” гэсэн тохироог “Шударга ёс” эвсэлтэй хийгээгүй. Зөвшилцөл бол хийсэн. Ямаршуу хэмжээний бүтэц байх юм бэ, юу шийдэх юм гэх зэрэг нэлээд хэд хэдэн асуудал дээр санал нэг биш байгаа. Жишээлбэл УИХ-д бүлгээс дээш суудал авсан намууд Засгийн газартай хамтарна. Ингэснээр улс төрийн тогтвортой байдлаа хадгалья, энэ байдал нь эдийн засгийн тогтвортой өсөлтөд хүргэнэ, эдийн засгийн өсөлт нь нийгмийн сайн хөгжил болж чадна гэсэн томъёоллыг хүлээн зөвшөөрч байгаа бол Засгийн газар бүрдүүлэх ажлаа чамбай зохион байгуулах хэрэгтэй. Бүлэг байгуулсан нам Шадар сайдтай болох, харин хамгийн олон суудал авсан нь Ерөнхий сайдаа томилоод бусадтайгаа хамтран ажиллах саналаа тавиад явья гэж анхнаасаа тохирсон. Гэтэл эвсэлд Шадар сайдын квот оногдохгүй болсон байна. Үүнийг зөвшөөрч чадахгүй. Мөн өргөн барьсан хуулийг задлаад үзэхэд, яамгүй хэрнээ Оюутолгой, Таван толгой, төмөр зам гэх зэрэг асуудлыг хариуцсан сайдын орон тоо байна. Эдгээр асуудал нь харьяа яамны сайдын эрхлэх асуудал дотор байж байгаа. Том төслүүд гэдэг шинжлэх ухаанч байдлыг шаардана. Тиймээс яамгүй сайд юу ч хийж чадахгүй. Мэргэжлийн яамтай байж том төслүүдийг хэлэлцэнэ шүү дээ” гэж хэллээ.