УИХ-ын нэгдсэн чуулганаар Засгийн газрын бүтэц бүрэлдэхүүний асуудлыг хэлэлцэж байна. Үүнтэй холбоотойгоор гишүүд Ерөнхий сайд Ч.Сайханбилэгээс зарим асуултуудыг асууж хариулт авч байна. Энэ үеэр Ерөнхий сайдас УИХ-ын гишүүн Ц.Оюунгэрэл ингэж асуусан юм.

УИХ-ын гишүүн Ц.Оюунгэрэл: ССАЖ-ын яамыг татан буулгаж байгаа гэсэн шийдвэрийг гаргасан тухай ярьлаа. Энэ нь төсвийн хэмнэлтийн хувьд гэвэл 1.6 тэрбум төгрөгийн төсөвтэй үйл ажиллагаа явуулдаг ийм яамыг татан буулгах тухай ярьж байна. Тэгэхээр энэ 1.6 тэрбум төгрөгийн төсвийг хэмнээд илүү ач холбогдолтой зүйл оруулаад ирчихсэн юм уу гэхээр Монгол Улсын сайд гэх төсөв нь тодорхойгүй, орон тоон тодорхойгүй зүйл ороод иржээ. Энэ бол том төслүүдийг зохион байгуулдаг сайд байх юм шиг байна. Тэгээд би энэ том төслүүдийг санхүүжүүлнэ гэдгийг судалж үзлээ. Тэгсэн манайд төмөр замыг шинэчлэх өргөтгөх Сайншандыг байгуулах гэж будилсан долоон жилд нэг их наяд 960 тэрбум төгрөг зарцуулжээ. Үүнээс жилд 241.3 тэрбумыг зарцуулсан байх юм. Байгуулагдаагүй төсөл, бий болоогүй төмөр замд л гэхэд ийм мөнгө зарчихжээ.  Үүнийг хуваагаад үзэхэд хэмнэх гээд байгаа ССАЖ яамны 1005 жилийн төсвийг зарцуулчихаад явж байна. Тиймээс  1.6 тэрбум төгрөгийн төсөвтэй яамыг татан буулгаад 1000 дахин төсөвтэй зүйлүүдийг санхүүжүүлэх гээд байна уу гэж асуумаар байна. Хоёрдугаарт хүнд сурталыг нь нэмэх гээд байгаа юм биш биз.  Хамгийн бага хүнд сурталтай хамгийн их хүнд үйлчилдэг яамаар манай яам тодорсон. Тэгвэл үүнийг салгаад хамгийн  их хүнд сурталтай, ачааллаа дийлэхгүй байгаа эрүүл мэнд, боловсролын яам руу салгаж өгөх гээд байна. Энэ төрийн хүнд сурталыг угт нь тултал бий болгох гээд байгаа юм уу. Гуравдугаарт XXI зуун руугаа яваад байгаа юм уу, XIX зуун руу явах гээд байна уу. Энэ зууны эдийн засаг ондоошил ялгарал дээр сууришсан байх ёстой. Ийм салбарын суурь нь тухайн орны соёл, спорт, аялал, жуулчлал байдаг. Энэ зарчмаар асуудлаа хэлэлцээд явах замд яагаад ийм саад учруулж байгаа юм бэ” гэж асуусан юм.
 
Харин Ерөнхий сайд Ч.Сайханбилэг: “Соёлын, спортын, аялал жуулчлалын нэг ч функц хаягдахгүй. Яг энэ нэр нэрээрээ төрийн захиргааны төв байгууллага буюу яамны нэрэнд орно.  Бүх функцууд тухай яамныхаа бодлогод шууд тусгагдаад явна. Хүнд суртал, завтай, завгүй гэдгийг ярих юм бол бүх яам дээр нээлтэй яригдах асуудал. Тухай яаман дээр байгаа зүйлийг хийх гэдэг нь бас өөр асуудал шүү.  Хоёрдугаарт яам бодлого боловсруулдаг болохоос  биш үйлчилдэг яам биш. Энэ хүрээнд нь асуудлаа бодох хэрэгтэй . Соёл спорт аялал жуулчлал Монголын хувьд маш чухал  өөртэй чинь  санал нэг байна. Одоо энэ ажлуудыг сайн хийх хэрэгтэй” гэлээ.