Ерөнхий сайд Ч.Сайханбилэг нь шинэ Засгийн газрын бүтцийг  15 яам, 19 сайдтай байхаар өргөн барьсан. Одоо гишүүд Ерөнхий сайдаас бүтэцтэй холбоотой асуудлаар асуулт асууж байна.

Тухайлбал УИХ-ын гишүүн Ц.Даваасүрэн “Засгийн газрын бүтцийг хэмнэлтийн горимд шилжүүлэх хэрэгтэй” гэж үзээд 13 яам, 16 сайдтай байхаар УИХ хууль баталсан. Гэтэл өнөөдөр бүтэц улам томроод ирлээ. Дээр нь Ерөнхий сайд өөрийг нь тоохгүй байсан нөхөртэйгээ гэрлэхээр гэрлэлт хэр удаан үргэлжилнэ гэж бодож байна. Юунд найдна вэ.  Улс орнууд компанийг жижиг бүтцээр ажиллуулдаг. Нэг компаниас болж улс сүйрч болохгүй. Таны хувийн хэвшилдаа хэт найдсан бодлого хэвээрээ юу. Та яг ямар зарчим барьж ажиллах юм. Энэ өргөн барьсан бүтцээс болоод “Эрдэнэт” үйлдвэрийг булаацаалдаад эхэллээ, Аж үйлдвэрийн яам нь авна, Уул уурхайн яам нь авна гээд. Хэнд нь харьяалуулах юм бэ” гэсэн асуулт тавилаа.

Ерөнхий сайд Ч.Сайханбилэг “Хэмнэлтийн горим барьж ажиллаж байгаа, цаашид энэ байтугай хэмнэлтийг хийнэ.  Сангийн сайд томилогдсоны дараа 2015 оны төсвийн тодотгол өргөн барина. Энэ хүрээнд 60 гаруй байгууллагын үүрэг, чиглэлийн давхардлыг арилгаж 1600-2000 орчим хүнийг цомхотгох асуудал яригдана. Ийм асуудлыг оруулж ирэх учраас төсвийн чангаруулсан бодлого барина. Би хийх ажилдаа найдаж байна, улстөрийн эрх ашгаас илүү улс орны эрх ашигт найдсан учраас үүнд найдаж байна. Хөшигний ард ямар нэгэн шийдвэр, процесс үйлдэхгүй, бүгдийг ил явуулна. Хувийн хэвшлээ бодлогоор дэмжиж, хямралаас гарна. Үйлдвэрийн харьяаллын тухайд хуучнаараа Ерөнхий сайдын харьяанд хэвээр явна” гэсэн хариултыг хэллээ.

Харин УИХ-ын гишүүн М.Батчимэг “Таны төсвийг хэмнэнэ гэсэн санаачилгыг дэмжиж байгаа. Гэхдээ хуулийн дагуу, ул суурьтай хэмнэлтийг явуулах ёстой. Хэмнэж байгаа гээд аль нэг салбарыг замбараагүй болгож болохгүй. Мөн энэ дагуу цомхотгол явуулах хэрэгтэй. Гэтэл байгуулагдаад жил ч болоогүй Тахарын албыг татан буулгах гэж байна. Энэ албыг яагаад татан буулгаж байгаа юм бэ” гэв.

Ерөнхий сайд Ч.Сайханбилэг хариулахдаа “Өнөөдөр бүх нам Засагт хамтарч байгаа ч гэсэн дэмжлэг болон шүүмжлэлийг аль, алиныг нь сонсоод явна. Төсвөө ч хэмнэнэ. Асуудлыг нилээн тооцоо судалгаатай хийнэ. Тиймээс Засгийн газар бүрдсэний дараа энэ ажлуудыг нарийн судалж үзээд хуулийн тооцоо судалгаатай хийх юм. Хариуцсан салбарын сайдад даатгаад явна” гэв. 

УИХ-ын гишүүн Г.Уянга “Зөвшилцлийн үр дүн юу болов. Намууд цаашид ямар ажлыг хийнэ гэж зөвшилцөж байгаа юм. Энэ талаараа хамтарч ямар нэгэн бичиг баримт гаргасан уу. Бүх хямралын суурь болох хуулийн өөрчлөлт дээр яаж ажиллана гэж тохирсон юм бэ. Мөн таны өргөн барьсан бүтэц дээр нэг том агентлаг алга болгосон байна. Монцамэг алга болгоно гэж ойлгож болох уу. Энэ нь дэлхийд гарах манай мэдээллийг хааж байгаа үйлдэл биш үү. Эргээд үндэсний аюулгүй байдалд нөлөөлнө” гэлээ.

Харин Ерөнхий сайд Ч.Сайханбилэг “Бүх намуудаас гарсан ажлын хэсэг 4-5 чиглэлээр хамтарч ажиллахаар болсон гэдгийг мэдэж байгаа.  Бид Засгийн газрын бүтцээ баталсаны дараа хамтарсан тунхаг гаргана. Хамтарч ажиллах гэрээний асуудлыг ярьж байгаа. Монцамэ агентлагийн хувьд 2012 оноос хойш төрийн захиргааны үндсэн бүтцэд орохгүйгээр үйл ажиллагааг явуулж байгаа. Цаашид Монцамэгийн үйл ажиллагааг сайжруулах, хөрөнгө мөнгө төсөвлөх зохион байгуулалттай ажиллуулна. Соёл байхгүй болно гэж ярьж болохгүй” гэв.