Засгийн газрын бүтцийг УИХ-ын чуулганаар үргэлжлүүлэн хэлэлцэж байна. Гишүүд Засгийн газрын бүтэц бүрэлдэхүүнтэй холбоотойгоор сонирхсон асуултуудаа Ерөнхий сайдаас асууж байна. МАН-ын бүлгийн гишүүн Ч.Хүрэлбаатар байр сууриа ингэж илэрхийлсэн юм.

УИХ-ын гишүүн Ч.Хүрэлбаатар: Өнөөдөр энд засгийн газрын гишүүд ард түмэн, эдийн засгаа бодохгүй байна гэсэн зүйл ярих юм. Би хоёр чихэндээ ч итгэхгүй байна. Хоёр жил тэр хүн юу хийсэн юм. Ажлаа хийхгүй  яасан юм бэ. Тийм учраас З.Энхболд даргаа, “Шударга ёс” эвслийнхэн та нар Монгол улсын эдийн засгийг нураасан шүү. Ардын нам хамтрах шийдвэр гаргахдаа улс орныхоо эрх ашгийг нэгдүгээрт тавья. Ардын намынхаа эрх ашгийг ард нь тавья гэж хамтрах шийдвэр гаргасан. Одоо бид эдийн засгаа сайжруулах цаг болсон. Ерөнхий сайдаа Засгийн газрын чинь бүтэц хэтэрхий том байна. Томоохон төсөл хариуцсан яамдууд, төсөл хариуцсан сайд нарыг ч оруулж ирж байна. Гэтэл хажуу талд нь тухайн зүйлийг нь хариуцсан яамнууд байна. Тиймээс үүнийгээ нэгтгэх хэрэгтэй. Дараагаар нь төсвийн хоёрдугаар хэлэлцүүлгийг хэлэлцэж байхад бид Тахарын алба, Харилцаа холбооны газар зэрэг хэд хэдэн агентлагуудыг татан буулгана гэж тохирсон шүү дээ. Ард иргэд бүсээ чангалж байна. Аж ахуйн нэгжүүд бүсээ чангалж байхад бид яагаад бүсээ чангалж болохгүй гэж. Засгийн газар данхайсан байвал цаашаа явахгүй. Агентлагуудаа хавсал хассан шиг хасах хэрэгтэй. Төсвийн хоёрдугаар хэлэлцүүлгээр ярьсан зүйлээсээ ямар амархан буцдаг юм бэ.  Тийм учраас доривтой шийдвэр гарга. Төр өөрөө бүсээ чангалах цаг болсон. Ингэж байж эдийн засгийн хямралаас гарна. Одоо бид бүтцийг орхиод сайдуудын асуудлыг ярих гэдэг нь үндсэндээ эрсдэлтэй. Ерөнхий сайдаа одоо нүдээ аниж байгаад хасахыг нь хасаад шийдвэрээ гаргаад явъя. Өнөөдөр нэг нөхөр сайд болдог гэтэл нөгөөдөх нь салбараа хамгаалаад юу ч хийлгэхгүй байх магадлалтай. Одоо хуучин эрх баригчид байсан хүмүүс олон юм яриад хэрэггүй. Одоо шинээр засагт орох гэж буй МАН ч гэсэн олон зүйл ярихгүй асуудлаа шууд дэмжээд явбал яасан юм бэ” гэсэн горимын санал гаргасан юм.

Харин Ерөнхий сайд Ч.Сайханбилэг “Одоо хэдүүлээ арагшаа биш урагшаа харж ажиллах цаг болсон. Би бүтцийн асуудал дээр түрүүн хэлсэн та анзаарахгүй өнгөрсөн бололтой. 2015 оны төсвийг ярьж байхад нэр нь ойролцоо, үйл ажиллагаа нь ойролцоо  төсөвт байгуулагуудыг татан буулгахаар тохирсон. Энэх ажлын хүрээнд 60 орчим байгууллагуудыг татан буулгахад бэлэн болсон. Ирэх оны төсвийн тодотголоор оруулж ирнэ. Харин УИХ дэмжиж өгөөрэй. Шинэ сангийн сайд томилогдох үед бид асуудлыг шийдээд дахин оруулж ирэх төлөвлөгөөтэй байна. Ингэж байж бид төсвөө хэмнэж чадна” гэж хариуллаа.