Чуулганы хуралдааны үеэр гишүүд Ерөнхий сайд Ч.Сайханбилэгээс Засгийн газрын бүтэцтэй холбоотой асуудлаар асуулт асуулаа. 

УИХ-ын гишүүн Ц.Нямдорж "Засгийн газрын бүтцийг хараад харамсаж байна. Заавал бүгдийг нь оруулах ямар шаардлага байсан юм. АН-ынхандаа сайдын суудал өгөх гэж зовоод л. Нөгөө эвссэн намуудад сайдын суудал өгөх гэж бас зовоод. Ямар ажил эрхлэх нь тодорхойгүй нэг сайдыг нэмж оруулж ирээд. Ингээд бантан болж байна. Ядаж Н.Алтанхуягийн оруулж ирсэн Засгийн газрын бүтцээр явахгүй. Заавал ингэж төр улсыг зовоох ямар шаардлага гарсан юм бол. Хэрэггүй зардал, орон тоо их байгаа гэдгийг тооцож үзээд их цөөхөн яамтай сайд нарын бүтэц оруулж ирэх юм болов уу гэсэн чинь байхгүй л байна. Үүнд би харамсаж байна. Хоёрдугаарт, УИХ-д суудалтай бүх намуудад сайдын суудал өгөлгүйгээр гишүүдийн амыг харж УИХ, парламент ёсыг байхгүй болгож байгаа увайгүй үйлдлийг би эсэргүүцэж байна. Тиймээс би үлдсэн хугацаанд сөрөг хүчний байр сууринд хатуу зогсох болно шүү. Төрийн эрх ашигт нийцсэн ганц нэг хуулийн төсөл оруулж ирвэл дэмжинэ ээ. Яагаад хүн бүрийн санаанд нийцэх гэж бүх яамыг нэгтгэж байгаа юм. Хэнд хэрэгтэй юм энэ олон яам. Яамдыг байгуулаад ажил сайжирдаг бол Монгол улс Кувейтийн хэмжээнд хүрчихээр боллоо" гэсэн юм.

Ерөнхий сайд Ч.Сайханбилэг "Ц.Нямдорж гишүүн наашаа хар. Би таны асуултанд хариулах гэж байна. МАН 45, АН 26 суудалтай байхад парламентад суудалтай бүх намууд нь хамтарсан Засгийн газар байгуулаад таныг 2008-2012 онд дөрвөн чиглэлд  сайд хийхэд чинь би цөөнхийн бүлгийг хариуцаад 2008-2009 оны дэлхий дахинд гарсан санхүүгийн хямралыг хамтдаа давсан юм. Тухайн үед би таны Засгийн газрын өмнөөс харамсаж байна гэж хэлж байгаагүй. Одоо ч хамтарч эдийн засгийн хүндрэлээс гарна гэж байгаа юм. Сөрөг хүчин болно гэж үргэлж иргэдэд таалагдах гэдэг. Тэр чинь өөрийн чинь шийдлийн асуудал. Одоо бүтээн байгуулалтын асуудлуудыг нэг сайд хариуцаад явах нь ажил сайн явна. Таны үед ч нэг сайд нь хийгээд явж байсан. Үйл ажиллагаандаа гол ач холбогдлоо өгөөчээ" гэсэн хариултыг өгөв.