Хэзээнээсээ хатуу, хорон үгээрээ алдартай УИХ-ын гишүүн Ц.Нямдорж УИХ-ын чуулганы хуралдаанаар Засгийн газрын бүтцийг хэлэлцэх үеэр дахин нэг шуугиан тарьсан үг хэлээд орхилоо. Тэрээр 19 сайдтай 15 яамтай шинэ Засгийн газрын бүтцийг дэмжихгүй байгаагаа илэрхийлээд Н.Алтанхуягийн сүүлд оруулж ирсэн хувилбараар явж болохыг сануулсан. Мөн Ерөнхий сайд Ч.Сайханбилэг Засгийн газрын бүтэц, бүрэлдэхүүнийг батлахдаа өөрийн намынхаа бүлэг фракцууд, шударга ёс эвслийнхний сандал суудлын гомдлыг барагдуулах гээд хэт том, данхар бүтэц оруулж ирж байна гэдгийг хэлсэн билээ.

    Тэрээр “Яагаад хүн болгоны саналд нийцэх гэж олон сайд яам оруулж ирэх гээд байгаа юм бэ? Өөрт чинь бололцоо байсан шүү дээ. Олон яамтайгаар улс хөгждөг бол Монгол Кувейт катар шиг болох болчихсон. Засгийн газрын сайд гэж ийм хамаагүй суудал болчихсон юм уу? Ямар ч портвелгүй сайд оруулж ирж байдаг. Ийм портвелгүй, хамаагүй сайд томилж байгаа юм бол Ерөнхий сайдаа нэг сайдынхаа суудлыг манай авгайд өгчих, Тэгээд Р.Гончигдорж бид хоёр зургаа зураан сараар эхнэрүүдээ ээлжилж сайд хийлгээд явья” гэж ихээхэн хоржоонтойгоор байр сууриа илэрхийлсэн. Харин хариуд нь Ч.Сайханбилэг “Таны ажилласан байсан Засгийн газарт ч порвелгүй сайд байсан шүү, мэргэжлийн хяналтын сайд, онцгой байдал эрхэлсэн сайд гэж байсан. Үүнийгээ мартаагүй биздээ” гэж хариу барив.

    Энэ бүх маргааны дараа Ц.Нямдоржийн хэлсэн үг ордноор нэг ярианы сэдэв болжээ. Хэдийгээр Ц.Нямдорж Засгийн газрын данхар бүтэц, эрхлэх асуудалгүй Монгол Улсын сайдын албан тушаалыг шүүмжилж байгаа ч үгэн дотроо үг агуулсан гэж тайлбарлах хүмүүс олон байна. Ер нь яагаад Ц.Нямдоржийн эхнэр сайд болж болохгүй гэж. Ц.Нямдоржийн гэргийн Ж.Долгормаа нь Улаанбаатар хотын захирагчийн ажлын албаны хүнс, үйлдвэр үйлчилгээний хэлтсийн даргаар олон жил ажилласан. Архи согтууруулах ундаа худалдаалах тусгай зөвшөөрөл олгохдоо авилга авдаг гэж зарим төрийн бус байгууллагууд ч мэдэгдэл хийж байсан. Харин энэ төрлийн бизнес эрхлэгчид огт өөр зүйлийг ярьдаг. Ж.Долгормаа хувийн хэвшлийн жаргал зовлонг ойлгодог, хуулийн шаардлагаа зүй зохистой тавьж чаддаг, зан харилцааны хувьд Ц.Нямдоржоос тэс өөр хүн гэж хэлэх нь бий. Ж.Долгормааг тухайн албан тушаалд байхад архи согтууруулах ундаа худалдаалах тусгай зөвшөөрлийн “ханш” гэж огт дуулдаж байгаагүй. Харин одоо бол архи, согтууруулах ундаа худалдаалах тусгай зөвшөөрлийн “тусгай ханш” 5-10 саяд хүрсэн гэдгийг бизнес эрхлэгчид гэрчлэх болсон. Тэгэхээр Ц.Нямдорж боломжгүй хувилбарыг бас яриагүй бололтой. Ингэж тайлбарлах хүмүүс цөөнгүй ажээ.

    Ямартай ч өчигдөр төрийн ордны ярианы сэдэв Ц.Нямдоржийн “авгай” байлаа. Монгол Улсын Засгийн газрын бүтцийг эрх баригчид ийнхүү олонхиороо хүч түрэн УИХ-д оруулж ирж байгааг цөөнгүй гишүүд шүүмжилж байгаа. Монгол Улсын сайд гэсэн ойлгомжгүй сайдын албан тушаалыг шинээр бий болгоод Оюутолгой, тавантолгой гэх мэт томоохон төслүүдээ хариуцуулна гэсэн Ерөнхий сайдын байр суурийг цөөнгүй гишүүд эсэргүүцэж байна. Хэрвээ ийм албан тушаал бий болгох юм бол Уул уурхайн яамны хэрэг бий гэж үү? Үүнийг УИХ-д суудалтай намууд, гишүүд, олон нийт огт хүлээн зөвшөөрөхгүй байхад Ерөнхий сайд бүлэг фракцуудын хүчний харьцааг тохируулах гэсэн уламжлалт “Алтанхуяг” аргаар өөрийнхөө танхимын томилгоог хийх гэж байна. Үүнд эгдүүцсэн хүн “эхнэрээ сайд болгоё” гэж хэлэхээс ч яах билээ.