Өчигдөр орой засаг хамтран байгуулахаар болсон АН, МАН-ынхан Мэргэжлийн хяналтын ерөнхий газар ямар сайдын мэдэлд байхав гэдгээс болж түнжин хагарсан гэж эх сурвалж мэдээллээ. Яамдын бүтэц бүрэлдэхүүнийг УИХ-аар батлах үеэр Мэргэжлийн хяналтын ерөнхий газар Ерөнхий сайдын мэдэлд байх уу? Тэргүүн Шадар сайдын харъяанд байх уу? гэдгээс болж УИХ-ын гишүүд талцсан байна. Уг нь Мэргэжлийн хяналтын ерөнхий газар Шадар сайдын мэдэлд байж ирсэн. Гэтэл энэ удаа Ч.Сайханбилэг Засгийн газрын шинэ бүтэц бүрэлдэхүүнийг өргөн барихдаа өөрийн харъяанд байлгахаар УИХ-д оруулсан. Ингээд МАН-ынхны бухимдлыг төрүүлжээ. Гэвч УИХ дахь МАН-ын бүлгийн дарга С.Бямбацогтын найруулсан "хор"-оор Мэргэжлийн хяналтын Ерөнхий газар Тэргүүн шадар сайдын мэдэлд үлдсэн байна. Сонирхолтой нь МАН-ынхны найруулсан хоронд "Шударга ёс" эвсэлийнхэн автаж Мэргэжлийн хяналтын Ерөнхий газрыг Тэргүүн Шадар сайдын мэдэлд байлгахыг дэмжсэнээр ганцхан гишүүний саналаар шийдэгдлээ. Ингэснээр боловсон хүчнээ шингээж ядаж байгаа МАН-ынхан Мэргэжлийн хяналтын Ерөнхий газар гэсэн Засгийн газрын тохируулагч агентлагтай болж чадлаа.