Ерөнхий сайд Н.Алтанхуяг огцороод яг нэг сар нэг хонож байна. Гэтэл дараагийн Засгийн газрыг бүрэн бүрэлдэхүүнээр нь томилж чадсангүй сунжирлаа. Уг нь өчигдөр бүх асуудлыг шийдвэрлэж сайд нарын ажлыг нь хүлээлцүүлэхээр бэлтгэж байлаа. Гэтэл МАХН-аас болоод сайд нараа УИХ-аар баталж чадсангүй.

Учир нь МАХН хэмээх хүчин нэг сарын хугцаанд хоёр яам дээрээ хэнийг сайд болгох вэ? гэдгээ тохирч чадахгүй хэрүүл тэмцэл өрнүүлсээр төрийг гацаачихлаа. Ер нь сүүлийн үед 2012 оны сонгуульд эвсэл болж орсон "Шударга ёс" эвсэлийнхэн МАХН, МҮАН-аараа задарч зам мөрөө хөөцгөөхөөр бэлтгэж байгаа гэх. Энэ ч өнгөрсөн долоо хоногийн үйл явдлаар батлагдаж байна. МАХН-ынхан бид олон суудалтай гэж МҮАН-ын хэдийгээ гадуурахсан гэх. Хамгийн ашигтай сайн яамдыг авна гэж даналзсан мэдээлэл тарж байна. Ийм болохоор л М.Энхсайханы тэргүүлэх МҮАН-ынхан МАХН-ынхаа нөхдөөс зайгаа барьж эхэлжээ. Тэгээд л М.Энхсайханыгаа Монгол Улсын сайд болгов. Угаасаа бүтээн байгуулалт хариуцсан яамгүй сайдыг М.Энхсайханд зориулж бэлдсэн. Мөн эдийн засгийн хямралаас гаргахад М.Энхсайханы хувь нэмэр байх ёстой гэж АН-ынхан ч, МАН-ынхан ч үнэлсэн бололтой.

Өчигдөр өдөр гэхэд МАН, АН, МҮАН-ынхан сайд нараа тодруулчихсан байв. Тэгээд л МАХН-ын хоёр сайдыг хүлээцгээсэн. Ерөнхийлөгч Ц.Элбэгдорж бас сайдад нэр дэвшигчидийг хүлээн авч уулзахаар хүлээгээд байв. Эцэстээ МАХН-ын хоёр сайдаас бусдыг хүлээн авч уулзаж, байр сууриа илэрхийлэн захиа даалгавараа өгөв. Дараа нь Ерөнхий сайд Ч.Сайханбилэг өөрийн Засгийн газрын гишүүдийнхээ нэрсийг УИХ-ын даргад өргөн барих гээд МАХН-ын хоёр сайдыг бас л хүлээв. Арга барагдаад МАХН-ын хоёр сайдыг орхиод өргөн барьсан юм. Ингээд УИХ-ын дарга шийдвэр гаргаж сайдад нэр дэвшигчидийг байнгын хороодоор хэлэлцүүлж эхэлсэн. Яг тэр үед МАХН-ынхан сайд нараа тодрууллаа. Биднийг хэлэлцүүлж өг гэж УИХ-ын дарга, Ерөнхий сайд хоёрыг шахсан гэх яриа саарал ордноор тарсан. Дахиад байнгын хороо зарлалтай биш. Дараа болгоё гээд хойшлуулсан. МАХН-ын хоёр сайд ингэж гацаа түгжээ үүсгэсэн учир өчигдөр чуулган орой эхэлж шөнийн нэг цаг өнгөрч байхад хоёр дахь өдөр үргэлжлүүлэхээр завсарлав. Ганцхан Тэргүүн шадар сайд У.Хүрэлсүхийг л батламжлав. Бусдыг нь амжсангүй. Хамгийн гол нь бүх яамдын ажилчид шинэ сайдаа хүлээгээд шөнө дөл болтол ажиллаж байв. Төрийн ордныхон бас ажиллав. Гэвч сайд нараа томилуулж чадалгүй хоёр дахь өдрийг хүлээхээр болов. Энэ үйл явдалд төрийн албан хаагчид ихээхэн бхуимдсан гэнэ. МАХН-ынхан хоёр сайд дээрээ тохирч чадахгүй байсан учир төрийг ингэж хөлдөө чирлээ.Уг нь сайд нар эртхэн томилогдоод ажил явсан бол хямралтай үед хаана хаанаа хэрэгтэй гэж ярих хүмүүс олон байна.

Эх сурвалжийн мэдээлж байгаагаар бол МАХН-ынхан эхлээд том яамд авна. Шадар сайд авна гэж их маргалдсан гэх. Дараа нь өөрсддөө ногдсон хоёр яамныхаа сайдыг томилох гэж ихээхэн хэрүүл тэмцэл, маргаан мэтгэлцээн болсон мэдээлэл тарж байна. Тэд зогсоо зайгүй БНСУ-руу залгаж, бие биеэ матсан бололтой. Тийм ч учраас тэднийг хүлээсэн саарал ордныхон БНСУ, Монгол хоёрыг холбосон утасны сүлжээ халтлаа ярилцаж халуухан юм болж байгаа гэж хошигноцгоож байсан гэнэ.

Өмнө МАХН-ынхан бас л иймэрхүү авир гаргацгаасан. Н.Алтанхуяг огцрохоосооо өмнө өөрийн засгийн газрын бүтцийг шинэчлэн УИХ-д өргөн мэдүүлсэн. Тэгээд дараа нь сайд нараа шинэчлэн УИХ-аар батлуулах гэхэд МАХН-ынхан бас ойлголцохгүй ихэд хүлээлгэсэн. Эцэст нь Н.Алтанхуяг тэднийг орхиод шинэ сайд нараа хэлэлцүүлэхээр УИХ-д хандаж байсан.

Ийнхүү МАХН хэмээх нэг хүний намаас болоод төр гацаад орж, сайд нараа хугацаанд нь томилуулж чадсангүй.