УИХ дахь МАН-ын бүлгийн дарга С.Бямбацогтоос цаг үеийн асуудлаар зарим зүйлийг тодрууллаа.

- МАН-ын бүлэг өмнө нь Н.Алтанхуягийн Засгийн газрын бүтцийг шүүмжилж байсан. Түүгээр зогсохгүй 13 яамтай болгоход нь үүнээс ч илүү цомхотгох боломжтой гэж байлаа. Гэтэл одоо 15 яамтай Засгийн газарт хамтарч ажиллах гэж байна. Ер нь Шинэ Засгийн газрын бүтэц дээр ямар байр сурьтай байгаа вэ?

-МАН эрх барих үедээ ч, хамтарсан Засгийн газарт ажиллах үедээ ч Засгийн газрын бүтцийг аль  болох цомхон байхыг дэмжиж үүнийгээ хэрэгжүүлсээр ирсэн. Харамсалтай нь Шинэчлэлийн Засгийн газар байгуулагдахдаа 19 гишүүнтэй байгуулагдсан. Бид үүнийг нь байнга шүүмжилж байсан. Энэ байр сууринд саяхныг хүртэл байсан. Засгийн газрын бүтэц бүрэлдэхүүнийг цомхон, чадварлаг болго гэж шаардаж ирсэн. Гэвч харамсалтай нь АН бид дангаараа улс орноо хөгжүүлж чадахгүй нь, бидэнтэй хамтарч ажиллаач гэсэн саналыг тавьсан. Бид сандал ширээ бодоогүй харин өмнөх зарчмаа баримталж хамтарч ажиллах шийдвэр гаргасан. Энэ үеэр хоёр намын ажлын хэсгүүд олон удаа уулзаж ярилцахад заавал энэ бүтцээр ажиллана гэсэн тулган шаардалт эрх баригчдаас ирсэн учраас ажиллах гэж байна. Энэ бол манай намын байр суурь биш. Нэгэнт Засгийн газарт хамтарч ажиллах учраас эрх баригчдын тавьж буй саналыг хүлээж авахаас өөр аргагүйд хүрсэн юм. Гэхдээ бидний өмнөх байр суурь хэвээрээ байгаа. Үндсэн чиг үүргийн сайд нар дотроос байж болно. Харин бусад сайд нар нь гаднаас байна гэж бид үзэж байгаа.

-Шинэ Засгийн газрын сайдад нэр дэвшиж байгаа хүмүүсийг МАН-ын бүлэг бүгдийг нь дэмжиж байгаа гэсэн үг үү?

-Сайдад нэр дэвшигчдийг УИХ-ын гишүүд дэмжих үгүйгээ өөрсдөө шийднэ. МАН-ын бүлэг сайдад нэр дэвшигчдийг 100 хувь үг хэлэлгүйгээр дэмжээрэй гэж хэлээгүй. Хамтарч ажиллах талаар ярилцах үед манай намын ажлын хэсгээс 13 яамтай байх саналыг оруулсан. Харин АН-ын ажлын хэсгээс 16 яамтай ажиллах саналыг оруулж ирсэн. Манайх яамдын тоог цөөхөн байлгах үндсэн хоёр зорилт тавьсан. Нэгдүгээрт төсвийн урсгал зардлыг танах. Үүнийг хэлэлцээрийн үед хүлээн зөвшөөрсөн. Хоёрдугаарт, энэ хамтарсан Засгийн газар бүтцийн хувьд юу хийж бүтээх вэ гэдэг нь гол асуудал байсан.  Дундын хувилбар нь 15 яам дээр хоёр ажлын хэсэг тохиролцсон. Шинээр сонгогдсон Ерөнхий сайд Ч.Сайханбилэг Засгийн газрын бүтэц батлагдмагц 2015 оны төсвийн тухай хуульд тодотгол хийхээ мэдэгдсэн.

-Хамтарсан Засгийн газар байгуулагдахаар дэд сайд болон агентлагийн дарга нарыг солих уу?

-Дэд сайдуудыг сөөлжилж томилж болох юм. Мэдээж УИХ дахь суудлын тоог хадгалах ёстой гэдэг үндсэн зарчмаа барьж байгаа. Харин төрийн бусад албан хаагчдын тувьд бол "Төрийн албан хаагчийн тухай хууль"-ийг баримтална. Хариуцлаггүй ажилласан, ямар нэгэн байдлаар хөрөнгө мөнгө шамшигдуулсан хэрэгт холбогдсон байвал хариуцлага тооцох нь нээлттэй. Харин хамтарч байна гэдэг нэрээр ажлаа хийж чадахгүй байгаа Төрийн албан хаагч нарын толгойг илээд сууна гэсэн ойлголт байхгүй.

-2015 оны төсөвт УИХ-ын гишүүн бүрт 90 сая төгрөг зарцуулахаар тусгасан байна. Эдийн засаг хүндрэлтэй байгаа үед энэ мөнгөнөөс татгалзаж болоогүй юм болов уу. Үүнд бүлэг ямар байр суурьтай байна вэ?

-УИХ-ын гишүүд тойрогтоо ажиллах, хууль боловсруулах, батлах, хуулийн хэрэгжилтэд хяналт тавих, гадаад томилгоо, унаа, утас, хэвлэл мэдээлэл зэрэгт үйл ажиллагаа явуулахад зориулагдсан тодорхой зардал байдаг. УИХ-ын гишүүдийн үйл ажиллагааны зардлыг хуулиар шийдэж өгдөг. Энэ зардал хэвээр явж байгаа. 2012 оноос хойш энэ зардалд нэг ч төгрөг нэмэгдээгүй. Хямралтай үед гишүүд өөрсдийн төсөв зардлыг нэмэгдүүлчихсэн гэх ойлголт гарч байгаа бол энэ буруу. Ийм асуудал байхгүй. Харин УИХ-ын гишүүд орон байраар хангагдах зэрэг асуудлаас татгалзсан.

-Тендерийн тухай хуулийн төслөөр бол "Худалдан авах ажиллагааны газар" татан буугдана гэсэн үг үү?

-Ерөнхийдөө тиймэрхүү агуулга тус хуулийн төсөлд байна лээ. Үүнийг бид дэмжихгүй байгаа.

-Зөвшөөрлийн турай хуульд зөвшөөрөл авахгүйгээр үйл ажиллагаа явуулах боломжтой ямар үйлчилгээнүүд багтаж байгаа вэ. Энэ талаар дэлгэрэнгүй мэдээлэл өгөх боломж байна уу?

-Өмнө нь УИХ-ын хуулиар биш Засгийн газрын гишүүн тушаал гаргаад, эсвэл Засгийн газрын хуралдаанаар маш олон тусгай зөвшөөрлийг нэмэгдүүлсээр байгаад өнөөдрийн байдлаар 1000 орчим болж, үүнийг УИХ-ын гишүүн, яамны сайд, орон нутгийн засаг дарга нар олгодог болсон байгаа. Үүнийг бид 300 орчим болгох ёстой гэж үзэж байгаа. Ингэхдээ орон нутагт олгох тусгай зөвшөөрлийг энгийн, онцгой гэж ангилж байгаа. Гэхдээ аль болох иргэдэд хүндрэл, чирэгдэл учруулахгүй байх, ойлгомжтой байх, хэн нэгэн дур мэдэж тусгай зөвшөөрөл гаргахгүй байх зэрэг зарчмуудыг барьж ажиллана.