УИХ-ын чуулганаар Засгийн газрын гишүүдийг томилох тухай асуудлыг үргэлжлүүлэн хэлэлцэж эхэллээ. Яг одоо Байгаль, орчин ногоон хөгжил аялал жуучлалын сайдад МАН-аас нэр дэвшиж буй Д.Оюунхоролын асуудлыг хэлэлцэж байна. Гишүүд нэр дэвшигчээс асуулт асууж хариулт авч байна.

Энэ үеэр УИХ-ын гишүүн Э.Баянсэлэнгэ нэр дэвшигчээс ингэж асуусан юм. Тэрээр "Газрын наймаатай холбоотой, ногоон байгууламжийг сүйтгээд байгаа зүйлтэй холбогдуулан та сайд болох юм бол ямар арга хэмжээ авах вэ, Шинэ сайдууд ажлаа шинээр эхлэх нь гарцаагүй. Өмнөх сайд нарын ажлыг үргэлжлүүлэх үү. Мөн хог хаягдалтай холбоотойгоор нийслэлтэй хэрхэн хамтарч ажиллах вэ" гэж асуусан юм.

Харин нэр дэвшигч Д.Оюунхорол "Би энэ яамтай холбоотой асуудлуудыг хэд хоногийн хугацаанд танилцаж үзсэн. Үнэхээр байгаль орчныг нөхөн сэргээх хэрэгтэй байна. Тиймээс би шинжлэх ухааны санал дүгнэлт дээр үндэслэн байгаль орчны асуудалд онцгой анхаарч ажиллана. Хог хаягдлын асуудлаар бол нийслэлтэй зайлшгүй холбоотой ажиллах нь зүйтэй. Тиймээс хамтарч ажиллах болно. Газар нутагт аялал жуулчлалын чиглэлээр авсан лицензүүдийг эргэж судлах хэрэгтэй гэдэг дээр санал нэг байна.  Энэ яамын сайдын хувьд судалж үзнэ. Мөн өмнө ажиллаж байсан сайдуудын залгамж шинж чанарыг үргэлжлүүлнэ гэж бодож байна" гэж хариуллаа.