Байгаль орчин ногоон хөгжил, аялал жуулчлалын яамны сайдаар Д.Оюунхорол гишүүн 93.1  хувийн саналаар дэмжигдлээ.  Санал хураалтын өмнө Д.Оюунхорол гишүүнд  хандаж зарим гишүүд санал бодлоо илэрхийлсэн юм. Энэ үеэр Г.Уянга гишүүн Гол мөрний эх ундаргыг хамгаалах зорилготой “Урт нэртэй хууль”-ийг өөрчлүүлэхгүй гэж Төрийн ордон руу буу шагайсны улмаас ял аваад байгаа “Гал үндэстэн” холбооны Ц.Мөнхбаярын захиасыг Д.Оюунхоролд дамжууллаа. Ц.Мөнхбаярын хувьд “Урт нэртэй хуулийг Д.Оюунхорол гишүүн л авч гарах болов уу?. Хөдөөнөөс гарсан хүн учир хөдөөгийн ард түмэнтэй амь нэгтээ байгаа байх. Орон нутгаас сонгогдсон цорын ганц эмэгтэй гишүүн учир  Д.Оюунхоролд ихэд итгэл хүлээлгэж байна. Энэ хуулийн хэрэгжилтэнд анхаарлаа хандуулахыг хүсч байна” гэх утгатай захиасыг Г.Уянга гишүүнээр дамжуулж шинэ сайд Д.Оюунхоролд дайжээ.