Монголын Боксын холбооны Удирдах зөвлөл энэ сарын 2-нд хуралдаж эрэгтэйчүүдийн шигшээ багийн гишүүн ОУХМ Х.Энхдэлгэрийг бүх насаар нь сонирхогчдын бокст тоглох эрхийг нь хасчээ. Мөн түүний дасгалжуулагч “Алдар” спорт хорооны дасгалжуулагч А.Гантулгыг олон улсын тэмцээн уралдаанд хоёр жилийн турш оролцуулахгүй байхаар шийдвэрлэлээ. Х.Энхдэлгэрийг эрхийг хасах болсон шалтгаан нь нас болон нэрээ дарсантай холбоотой юм. Тэрээр өөрийн насаа гурван насаар хасч, дүүгийнхээ нэрээр тэмцээнд оролцож байжээ. Х.Энхдэлгэр гэдэг түүний дүү ба жинхэнэ нэр нь Хархүүгийн Энх-Амар юм байна. Насаа нууж тэмцээнд оролцож байсан нь Инчёны Азийн наадамд оролцох гэж явж байхдаа Солонгосын хил гаалийнханд баригдаж илэрчээ.