Хоёрдугаар суваг телевизийн сэтгүүлч Ц.Мөнхбаясгалангийн хөтлөн явуулдаг "Цензургүй яриа" нэвтрүүлэгт өчигдөр Монгол улсын 26 дахь ерөнхий сайд асан С.Баяр оролцсон юм.  Тэрээр нэвтрүүлэгт оролцох үеэрээ Ерөнхийлөгч асан Н.Энхбаярын хэлсэн "Би Тавантолгойн асуудлаар зөв байр суурь баримталж байсан. Тиймээс намайг энэ асуудалтай холбоотойгоор ялалсан" гэх асуудлыг хууль хяналтын байгууллагаар шалгуулна гэж хэллээ.
                 Түүний үзэж буйгаар энэ бол маш ноцтой, маш чухал асуудал ажээ.  Тиймээс уг асуудлыг шалгах ёстой гэнэ. С.Баяр хэлэхдээ "Би зүгээр өнгөрөхгүй. Хэрэв үнэн бол хуулиар тогтоогдоод би тэргүүтэй гэмтэй хүмүүс нь хариуцлагаа хүлээнэ. Харин Тавантолгойн асуудлаар Н.Энхбаяр худал зүйл ярьсан бол хууль хяналтынхан тогтоох хэрэгтэй. Гэхдээ Н.Энхбаярт ял шийтгэл оноо гэхгүй. Хэрвээ худлаа ярьсан нь тогтоогдвол худлаа ярьсанаа Монголын ард түмний өмнө хүлээх хэрэгтэй" гэсэн юм. Тавантолгойтой холбоотой асуудлыг Монгол улсын гуравдахь Ерөнхийлөгч асан Н.Энхбаяр "Монгол тулгатны зуун эрхэм" нэвтрүүлэгт оролцох үеэрээ ярьсан юм.