Хууль зүйн сайдад нэр дэвшсэн Д.Дорлигжавыг дэмжих үү, эс дэмжих үү гэдэг санал хураалт удахгүй эхэлнэ.  Санал хураалт хараахан эхлээгүй байгаа бөгөөд яг одоогийн байдлаар Д.Дорлигжаваас  зарим гишүүд холбогдох асуултуудыг асууж байгаа юм.

Тухайлбал, Ц.Нямдорж гишүүний хувьд олон жил яригдсан эмнэлгийн асуудлыг хэрхэх ёстой вэ гэж тодруулахад " Энэ байшин руу шагайж ч үзээгүй. Засгийн газрын хэмжээнд энэ эмнэлгийг байгуулах үгүйг ярьж байж л шийднэ" гэв.

Тэгвэл Ц.Оюунгэрэл гишүүн Д.Дорлигжаваас хүний эрхтэй холбоотой зарим зүйлийг тодрууллаа.

- Хүмүүсийн гэм буруугүйд тооцох эрх гэдэг манайд яахын арагүй үгүйлэгдэж байна. Хэнийг ч болов хэргийн сэжигтнээр татангуутаа овог нэр, зураг хөрөгтэй нь хэвлэл мэдээллээр цацаж байгааг өөрчилж чадах уу?. Тэр дундаа Эрүүгийн байцаан шийтгэх ажиллагааны үеэр маш их хүний эрхийн зөрчлүүд гардаг. Гадаадын иргэд ч энэ асуудалд өртөж байна?

-Ял эдэлж байгаа гадаадын иргэн 30 гаруй хүн бий. Гадаадын иргэдийг хэтэрхий их хүнлэг бусаар хандаад байгаа юм шиг бодож болохгүй. Гадаадын иргэн шалгагдах явцад томоохон улсууд манайхыг дарамталж байгаад паспортыг нь аваад гаргаад явуулчихдаг зүйл олон байсан. Энэ нь уг гадаад иргэн ял завшсан гэсэн үг. Тиймээс Монгол улсад амьдарч байгаа гадаадын иргэн Монголын хуулийг сахиж ажиллах ёстойг бид сануулах ёстой. Тэгэхгүй бол манай хууль гадны хүмүүсийн өмнө хүчгүйдэж болзошгүй байна.  Шинжээчээ сольсоор байгаад үйл явдлаа өөрсдөө улам сунжруулдаг. Тэгсэн хэрнээ эргээд Монгол Улс хүний эрхийг зөрчиж байна гэдэг. 

-Хуулийн байгууллагууд хамтраад хүний эрх зөрчдөг болсон юм биш үү?.

-Мөрдөх албаны хууль УИХ-д өргөн баригдсан байгаа. Минийхээр бол үүнийг татаж аваад, мөрдөн шалгах байгууллагуудыг нэг тогтолцоонд хамруулж, ижил бүтэц, зорилготой тогтолцоонд оруулах ёстой гэж боддог. Хүний эрх хамгаалах тал дээр манай улс хангалттай сайн. Гэмт хэрэг илрүүлэх явцад хүн болгон өөрийгөө буруугүй гэдэг. Эцэст нь татагдангуутаа энэ хүнийг хорилоо гэж яридаг. Хэрэг илрүүлэх гэж хуулийн байгууллага нотлох гэж маш их зүйл хийдэг шүү дээ.

-АТГ-ын хүний эрхийг дураараа зөрчдөг энэ асуудлыг шийдэх хууль эрхзүй оруулж ирэх бодол байна уу?. Энэ байгууллага хүний эрх, гэм буруугүйд тооцох эрх зэргийг зөрчиж байгаа нь шударга уу?. Бүр хүнийг өмгөөлсөн өмгөөлөгчийн эсрэг хэрэг үүсгэж байгааг яаж засах вэ?

-Өмгөөлөгч бас Монгол Улсын хуулийн хүрээнд ажиллах эрхтэй. Өмгөөлөгч гэхээсээ илүү улс төрийн үйл ажиллагаа явуулдаг хүн байж болохгүй.  

Д.Дуулим