Чуулганы нэгдсэн хуралдаанаар Боловсрол, соёл, шинжлэх ухааны сайдаар УИХ-ын гишүүн Л.Гантөмөрийг томилох эсэх асуудлыг хэлэлцээд гишүүдийн 95 хувийн саналаар дэмжлээ. Түүнийг 60 гишүүнээс 57 нь дэмжсэн юм.

Хэлэлцэж буй асуудалтай холбогдуулан гишүүд сайдад нэр дэвшигчээс асуулт асуусан юм. Тодруулбал, УИХ-ын гишүүн Ж.Батзандан "Хүүхдийн үдийн цай хөтөлбөр болон цэцэрлэгийн хоолны мөнгийг нэмэхгүй бол өргөн хэрэглээний бараа бүтээгдэхүүний үнэ хурдацтай өсч байгаа энэ үед нэг хүүхдэд 600 төгрөгөөр хоол бэлтгэх нь чанар, аюулгүй байдалд сөргөөр нөлөөлнө. Энэ асуудлыг шийдэх шаардлагатай" гэв. Үүнд нэр дэвшигч Л.Гантөмөр "Үдийн цай 400 төгрөг байсан. Одоо 600 төгрөг болж өссөн. Харин цэцэрлэгийн хоолны мөнгийг өсгөнө. Өсгөхдөө талыг нь эцэг, эхээс гаргана" гэж хариуллаа. Түүнд сурагчийн дүрэмт хувцас болон дээд боловсролын системийн дутагдлыг засаж залруулах саналыг гишүүдийн зүгээс дэвшүүлэв.

Мөн УИХ-ын гишүүн Л.Энх-Амгалан “Боловсролын багц хуулийг батлахдаа тэтгэвэрт гарч байгаа багшид 36 сарын цалинтай тэнцэх хэмжээний урамшуулал олгоно гэсэн заалт оруулсан. Гэтэл Сангийн яаманд 2015 оны төсвийг тодотгох хүрээнд 36 сарын цалинтай тэнцэх хэмжээний тэтгэлгийг 12 сар болгон бууруулах нь. Ийм байдлаар үнэлээд эхлэх юм бол боловсролын салбарт багшлах багш олдохгүй болно. Боловсролын салбарт ажиллаж байгаа багш, мэргэжилтнүүдийн ганц хорогдож байгаа юм нь нэг удаагийн тэтгэмж. Үүнийг хасч болохгүй. Мөн хөдөөгийн сургуулийн багш нарын нийгмийн асуудлыг шийдвэрлэхэд анхаарахгүй бол сургуулийнхаа дотуур байранд амьдардаг багш олон байна” гэлээ.

Одоо чуулганы хуралдаанаар Зам тээврийн сайдаар Ш.Төмөрхүүг томилох тухай асуудлыг хэлэлцэж байна.