Ардчилал, хүний эрхийн өдрийг тохиолдуулан МАН-ын гишүүд өнөөдөр МУИС-ийн Эдийн засгийн сургуулийн өмнөх талбайд байрлах төр, нийгмийн зүтгэлтэн Жамбын Батмөнхийн хөшөөнд цэцэг өргөж, хүндэтгэл үзүүлнэ. Ж.Батмөнх нь БНМАУ-ын Ерөнхий сайд, төрийн тэргүүн, эрдэмтэн, профессор төр нийгмийн томоохон зүтгэлтэн юм. Тэрбээр 1974 онд БНМАУ-ын Сайд нарын Зөвлөлийн орлогч дарга, мөн оны зургаадугаар сард БНМАУ-ын Сайд нарын Зөвлөлийн дарга буюу ерөнхий сайдаар томилогдсон. 1984 он хүртэл БНМАУ-ын 13 дахь ерөнхий сайдаар, 1984-1990 онд АИХ-ын Тэргүүлэгчлийн даргаар буюу төрийн тэргүүнээр ажиллажээ. Ардчилсан хувьсгалын үед Ж.Батмөнх төрийн тэргүүнээр ажиллаж байсан бөгөөд ардчилсан хувьсгалыг оготны хамраас цус гаргалгүйгээр хийсэн нь түүний ач гавьяа, ухаалаг шийдвэр байсан. Ж.Батмөнх түүхэн томоохон шийдвэр гаргаж, өөрийн удирдаж байсан Улстөрийн товчоогоо бүрэн бүрэлдэхүүнээр огцрох шийдвэр гаргаж чадсан юм.
