Хууль зүйн дэд сайд асан Э.Эрдэнэжамьян дэд сайдын суудлаа өгснөөсөө хойш нам жим амьдарч байна. Түүнийг Интерполын товчоонд МАХН-ын дарга Н.Энхбаярыг өмөөрөн захиа бичсэн нь мөрдөн байцаалтын ажиллагаанд саад учруулсан гэж АТГ-аас буруутган шалгасан. Улмаар шүүхээс Э.Эрдэнэжамьянг гэм буруутайд тооцсоноор улс төрийн албан тушаал эрхлэх эрхийг хоёр жилийн хугацаагаар хассан юм. Тэгвэл дэд сайдын суудлаа өгсөн Э.Эрдэнэжамьян бизнест хөл тавьсан байна.

Ажлаа хүлээлгэн өгснөөс хойш хурал семинар, олон хүн цуглаад арга хэмжээ зохион байгуулдаг заал тохижуулсан аж. Хүлээн авалтын маягаар засаад суухад нийтдээ 600-800 хүн багтах боломжтой. Босоо хүлээн авалт хийхэд 1000-аад хүн багтах том заал түрээслэж аваад ажиллаж байгаа гэнэ. Одоогоор 50-иад шинэ ажлын байр гарган ажиллаж байгаагаа ч онцолсон юм. Харин түүний ажиллуулж байгаа газар Хан-Уул дүүргийн нутаг дэвсгэрт байрладаг байна.
Түүний хувьд ашгийн төлөө гэхээсээ илүү залуучуудад зориулсан ажил хийе гэж бодсоны үндсэн тус газрыг ажлуулахаар болжээ. Өөрөөр хэлбэл, залуучууд цуглаад хуралддаг, үзэл бодлоо солилцдог, бөөндөө цуглахад аятайхан газар байдаггүй учир заавал ресторан, бааранд орж идэж ууж, захиалж суухгүйгээр тус газрыг сонгох боломжтой болгосон гэнэ.  
Тус газар ашиглалтад орсон бөгөөд одоо шинэ жилийн арга хэмжээ хийгдэж байна.

Дэд сайд асан Э.Эрдэнэжамъяны хувьд улстөрөөс өөрийгөө гарсан гэж бодохгүй багйаагаа хэллээ.  Тэрбээр “Хүний шашин шүтэх, улстөрийн үзэл бодлоо илэрхийлэх эрхийг хааж чадахгүй. Тиймээс улстөрийн албан тушаал гэхээр сайд, УИХ-ын гишүүн, дэд сайдын албан тушаалыг л хашиж болохгүй байх.  Бусад улстөрийн үйл ажиллагааг явуулж болно. Тэр ч утгаасаар намынхаа Гүйцэтгэх товчооны хуралд оролцоод байр сууриа илэрхийлээд явж байна. Улстөрөөс өөрийгөө гарсан гэж бодохгүй байна” гэв.
 Э.Эрдэнэжамъян хуульч мэргэжилтэй. Харин одоогоор мэргэжлээрээ дагнаж хийж байгаа зүйл байхгүй байгаа гэнэ. Хууль зүйн сайд Х.Тэмүүжингийн шинэчлэлээр хуульч гэж бүх эрхзүйч мэргэжилтэй хүмүүсийг хэлж болохгүй гэж байгаа. Зөвхөн өмгөөлөгч, прокурор, шүүгч 3 л хуульч байна гэж заагаад өгсөн. Тиймээс тэрбээр одоо өөрийгөө эрхзүйч гэсэн ангилалд оруулж байгаа аж. Тиймээс эрхзүйч, хуульч мэргэжилтэй багш нартай “Хуульч, эрхзүйчдийн холбоо” гэж олон жилийн өмнө байгуулагдсан холбооны тэргүүнээр  ажиллах бодолтой байгаа юм байна. Он гаргаад энэ холбооны тэргүүнээр ажиллаж эхлэх нь.

Д.Дорлигжав гэдэг хүн өөрөө улс төрч хүн. Намын дарга байсан, сонгуулийн ажил хийж байсан хүн. Өөрөө ч хууль зүйн мэдлэгтэй, дөртэй учраас Хууль зүйн сайдыг хийхэд ямар ч асуудал байхгүй гэж тэрбээр үзэж байгаа аж. Харин прокурорын байгууллагад бол болохгүй байсан гэдгийг шулуухан хэллээ.  Учир нь прокурорын байгууллага бол улстөрөөс ангид байх учиртай. Нэг намын ч юм уу, улс төрч юм уу тус байгууллагыг удирдана гэдэг утгагүй. Прокурорын байгууллага бол намын асуудал, бодлого ярьдаггүй. Яг хүний амьдрал ярьдаг, шийддэг, эрх чөлөөтэй байх эсэхийг шийддэг. Тиймээс улстөр оруулж болохгүй. Тэгэхээр Д.Дорлигжавын хувьд прокурорын байгууллагыг удирдана гэдэг утгагүй байсан гэдгийг тэрбээр цухас дурдсан юм.

“Үндсэн хуулийн агуулгаар гэх юм уу улс төрийн онолоор энэ буруу л юм болж байгаа юм. Бодитойгоор харахад сөрөг хүчингүй болчихлоо. Манай нам сөрөг хүчин болох ёстой байсан. Гэвч цаг үеийн шаардлагаар Засгийн газарт хамтарлаа. Арванхоёрдугаар сарын 1-нд аль аль нам зөвшөөрөөд нэгдлээ. Тус өдөр бол ХДХВ-ын эсрэг өдөр. Тэгэхээр би сөрөг хүчний олдмол хомсдолтой болчихлоо гэж ёожилж хэлээд байгаа юм. Сөрөг хүчингүй болно гэдэг сайн зүйл биш” гэлээ.