Чуулганаар яг одоо 2014 оны төсвийн тухай хуульд өөрчлөлт оруулах талаар асуудлыг хэлэлцэж байна. Энэ үеэр Сангийн сайдаас УИХ-ын гишүүн Д.Батцогт ингэж асуусан юм.

УИХ-ын гишүүн Д.Батцогт “Оруулж ирсэн бүх зүйл чинь буруу, түүхий байна. Сангийн сайд энэ зүйлээ буцааж татаад хаана ямар хөрөнгө оруулалт хэдэн хувьтай байна гээд бүх зүйлээ тодорхой болгоод оруулж ир. Саналуудаа бодитой оруулж ирэх хэрэгтэй. Эдийн засгийн хөгжлийн яамныхан хамаг төлөвлөлт, будлианыг хутгаж хаячихаад одоо энд алга байх юм. Сангийн сайд энэ талаар хариулт өгөөч. Төлөвлөхийг нь төлөвлөөд шийдэх ёстойг нь шийдчихээд алга болчих юм. Та ажилдаа очоод хоёр хоносон таныг буруутгах юм алга. Засгийн газраас оруулж ирсэн саналыг үндэслэж шийдвэр гаргамаар байна. Белгийн засгийн газраас өгсөн хоёр тэрбум төгрөгийн асуудал өнгөрсөн хоёр жилийн төсөвт хоёуланд нь ороод ирэх юм. Гэтэл энэ 2014 оны өөрчлөлт дээр дахиад ороод ирсэн байна. Энэ төсвөө буцааж татаад ирэх оны төсөвтэй дахин хэлэлцэх нь зүйтэй. Хамгийн гол нь Эдийн засгийн хөгжлийн яамны хүмүүс чинь хаана байна та тодорхой хариулт өгөөч” гэлээ.

Сангийн сайд, УИХ-ын гишүүн Ж.Эрдэнэбат “Би түрүү хэлсэн. Бүх юмыг залруулаад ороод ирэх хугацаа бидэнд алга байна. Гүйцэтгэл нь ороод ирсэн тохиодолд санхүүжүүлэх зорилт тавьж байна. Ховдод гучин хувийн гүйцэтгэл гарсан бол тэр хувийнхаа санхүүжилтыг авах болно. Эдийн засгийн хөгжлийн яамны нөхдүүд яам нь татан буугдсан, сангийн яаманд оронтоо байхгүй учраас одоогоор ажилгүй байгаа. Үүнийг Засгийн газар тун удахгүй шийдээд явах байх. УИХ-аас ирэх оны төсвийг бодитой шийдэх хэрэгтэй гэж хэллээ. Хэрвээ төсвөө бодитой болгоё гэвэл ирэх оны төсөвт 2014 оны гүйцэтгэлд ороогүй зүйлээ нэмж суулгахгүй байх хэрэгтэй. Одоо бүгдээрээ орхигдсон зүйлээ үлдээгээд ард түмэн, орон нутгаа худлаа ярьж хуурдаг байдлаа өөрчлөх хэрэгтэй" гэсэн юм.

Харин УИХ-ын гишүүн М.Зоригт “Засгийн газар гараанаасаа гарахдаа л ингээд байвал болохгүй. Анхнаасаа засна, өөрчлөнө гэдэг зүйл ярьчихаад. Тодотголоо оруулж ирэхдээ дутуу хандаж байна. Үүрэгтэй бол ямар ч асуудлыг орхиод судлах хэрэгтэй шүү дээ. Ядаж танай засаг ажлаа авахад эдийн засаг ийм байна гэдгээ бидэнд болон иргэдэд хэлэх хэрэгтэй.  Ажлын хэсгээр дамжуулаад засвар хийх боломжтой биз дээ. Жил жилийн улсын төсвийг батлагдахад бодит зүйлээ олж хардаггүй шүү дээ. Ийм маягаар явбал хийсэн бүх зүйл чинь худлаа болно. Сайдаа ажлын хэсгийнхэнтэй хоёр хоног хэлэлцээд асуудлаа тодорхой болгоод ороод ирвэл яасан юм бэ” гэв.

УИХ-ын гишүүн, Сангийн сайд Ж.Эрдэнэбат “Та бүгдийн хэлж байгаа төсвийг бодитой тооц гэсэн зөвлөгөөг хэрэгжүүлэхийн төлөө ажиллаж байна. Цаашдаа ч гэсэн тэгж ажиллана. Нэн түрүүнд гүйцэтгэлээ ямар ч байсан 100 хувь санхүүжүүлмээр байна. Үүнийгээ биелүүлнэ гэвэл бонд  гаргах эсвэл дансанд байгаа бүх зүйлээ ашиглаад ирэх ондоо ямар нэг асуудалгүй шилжих гарц л байна. 2015 оны төсвөөс тодотгол хийж хасах зүйл ярьж байхад 2014 оны төсвөөс санхүүжүүлт аваагүй төслүүдийг ирэх оны төсөвт суулгана гэдэг хэцүү" гэсэн юм.