УИХ-ын чуулганаар Монгол Улсын 2014 оны төсвийн хуулийн төсөл хийгээд холбогдох бусад хуулийн төслүүдийн нэгдүгээр хэлэлцүүлгийг хийх үеэр гишүүд нилээн хурц шүүмжлэлүүдийг хэллээ.

Тухайлбал, УИХ-ын гишүүн Г.Уянга “УИХ жил бүр худлаа төсөв баталдагаа болих хэрэгтэй. Төсөв нь 1 их наядаар тасраад түүнийгээ нөхөх гэж ингэж зүдэрч байгаа нь манай төр чадамжгүй болсны илрэл. Төсөвт тодотгол хийхдээ цэцэрлэг хасч болохгүй ээ. Тэгэж их хасах гээд байгаа яамаа цөөл. Бие, биедээ найр тавьж өгсөн ажлын орон тоогоо тана. Хэрвээ бид Оюутолгойн 700 мянган тонн зэсийн 34 хувийг өөрсдөө борлуулбал 3 их наяд төгрөг болно. Оюутолгойгоос мөнгөө ав. Улсын төсвийнхөө тал хувь шиг мөнгийг Оюутолгойд алдчихаад өнөөдөр цэцэрлэг хасна гэж ярьж байгаа бол энэ УИХ тарах хэрэгтэй. Баялагаа гадныханд алдчихаад авч чадахгүй байж хүүхдүүдийн цэцэрлэгээс хасах тухай ярьж байна. Үүнийг шийдэх гэж МАНАН болсон юм байгаа биз дээ. Чингэлтэй дүүрэгт эмнэлэг, цэцэрлэг бариулах төсвийг УИХ-ын төсөвт суулгаж байсан. Гэтэл аль 2012 онд батлуулсан төсөв нь өөрөө хэрэгждэггүй. Ийм байж болохгүй. Энэ УИХ тарах хэрэгтэй” гэлээ.