Хуулийг хэлэлцүүлэх үеэр УИХ-ын гишүүн Д.Эрдэнэбат, “Би тамхи татдагийнхаа хувьд нийгэмд адлагдах ёсгүй.  Тамхи татах нь сайхан зүйл биш. Гэхдээ миний энэ эрх рүү зөв буруу, гутамшиг гээд давшилж болохгүй. Монголын хүн амын 30-40 хувь нь тамхи татдаг. Тэдгээр хүмүүсийн эрх ашгийг хүндэтгэж тамхины цэг байгуулаад өгчихвөл хуулийнхаа хүрээнд зохицуулагдаад явах боломжтой” гэсэн бол УИХ-ын гишүүн Г.Баярсайхан, “Д.Эрдэнэбат гишүүн та Аж үйлдвэрийн сайдаар томилогдсон. Тиймээс улс орны эрх ашигт нийцсэн зангарагтай асуудлыг оруулж ирж хэлэлцүүлэх хэрэгтэй. Та хувийн ашиг сонирхлын үүднээс  асуудалд хандаж байна. Хүүхэд залууст УИХ-ын гишүүн тамхи татах нь зөв гээд яриад сууж болохгүй шүү. Тиймээс та энэ хуулиа татчих” хэмээн хэлсэн юм.

УИХ-ын гишүүн Л.Болд, “Энэ бол цэвэр эрүүл мэндийн асуудал. Тиймээс Эрүүл мэнд, спортын сайдын хэлснээр энэ асуудлыг шийдчихье” гэсэн юм.  Эрүүл мэнд, спортын сайд Г.Шийлэгдамба хариу болгож хэлэхдээ, “Хуулийг дэмжихгүй. Дэмжихгүй байх үндэслэлүүд бий. Шаардлагатай гэвэл тайлбарлаж болно” гэлээ.  УИХ-ын гишүүн Н.Энхболд, “Тамхи татдаг бол тэр хүнийг дүгнэх цорын ганц үзүүлэлт биш. Тамхи татаж буй тэдгээр хүмүүсийн эрх ашгийг бодолцоход болохгүй гэх зүйлгүй. Уушгины өвчнийг зөвхөн тамхинаас болчихлоо хэмээн тогтоосон зүйл анагаахын шинжлэх ухаанд байхгүй” гэв.  Үүний дараагаар гурван гишүүн тус хуулийг дэмжиж, мөн гурван гишүүн эсэргүүцэж үг хэлсний дараагаар санал хураалт явуулахад хуралдаанд оролцсон гишүүдийн олонх “Хэлэлцэх нь зүйтэй” гэж үзлээ.