УИХ дахь эвслийн бүлэг өнөөдөр өглөө хуваарийн дагуу хуралдсан юм. Тэгвэл бүлгийн хурлын талаарх мэдээллийг  дөнгөж сая “Шударга ёс” эвслийн бүлгийн дарга Н.Батцэрэг сэтгүүлчдэд өглөө. Эвслийнхэн өнөөдөр Засгийн газраас өргөн барьсан Зөвшөөрлийн тухай хууль болон Ерөнхийлөгчөөс УИХ-д өргөн барьсан Нийтийн сонсголын тухай хуулийн төслийг хэлэлцсэн байна. Тэд Зөвшөөрлийн тухай хуулийн хүрээнд Барилгачдын холбооны удирдлагууд болон Монголын барилгын материал үйлдвэрлэгчдийн холбооны удирдлага мөн төрийн бус байгууллагуудын удирдлагуудыг урьж хэрэгцээт мэдээлэл  авч, санал бодол солилцжээ. Ингээд Зөвшөөрлийг цэгцлэх талаар хуулийн төсөл өргөн барьсан нь зөв хэмээн тус бүлгийнхэн үзсэн учраас бүх гишүүд Засгийн газраас өргөн барьсан Зөвшөөрлийн тухай хуулийн төслийг УИХ-аар хэлэлцэж, дэмжих нь зүйтэй гэжээ.
                                Харин тэдний хэлэлцсэн хоёр дахь хуулийн төсөл бол Нийтийн сонсголын тухай хуулийг төсөл юм. Уг хуулийн төсөл нь иргэний нийгмийн оролцоог идэвхижүүлэх, иргэд төрийг шууд болон шууд бусаар барилцах эрхийг нь хуулиар олгох боломж бололцоог бүрдүүлэх зорилготой ажээ. Ингээд тус хуулийн төслөөр хэлэлцүүлэг өрнүүлэхэд эвслийн бүлгийн гишүүдийн олонх дэмжсэн байна. Мөн эвслийн бүлгийн дарга Н.Батцэрэг "Энэ долоо хоногт яригдах ёстой гол хуулийн төсөл бол 2014 оны төсвийн тодотголын тухай хууль гэдгийг онцлоод “Шударга ёс” эвсэл уг хуулийн төслийг дэмжинэ. Энэ 2014 оны төсвийн тухай хуулиас илүүтэй ирэх оны төсвийн тодотголд Засгийн газар болон УИХ-тай хамтарч ажиллах ёстой" хэлсэн юм.