УИХ-ын чуулганы хуралдаан өглөө 09 цагаас эхлэх байсан ч өдий болтол хуралдахгүй хойшилсон хэвээр байна. Эх сурвалжийн мэдээлж буйгаар чуулган хойшилох болсон шалтгаан нь Засгийн газрыг хамтарч байгуулсан намуудын зөвшилцөлтэй холбоотой гэнэ. Учир нь өчигдөр дэд сайдуудыг томилохдоо давхар зарим яамны Төрийн нарийн бичгийн дарга нарыг томилсон. Үүнд нь салбар хариуцсан сайд нар ихээхэн бухимдалтай байгаа аж. Мөн намууд дотроо шинээр томилогдох Төрийн нарийн бичгийн даргад нэр дэвшүүлэх хүмүүсээ ярилцаж байгаа гэсэн таамаг ч явж байна. Ямартаа ч чуулган энэ хэвээрээ хуралдахгүй байвал цуцлагдаж ч магадгүй юм. Уг нь өнөөдөр чуулганаар төсвийн тодотголын тухай хуулийн төслийн хоёр дахь хэлэлцүүлэг, Тамхины хяналтын тухай хуульд өөрчлөлт оруулах тухай хуулийн төсөл зэрэг олон чухал хуулиудыг хэлэлцэх ёстой.
