Налайхын Засаг дарга Х.Болдбаатар огцорлоо. Налайхын дүүргийн Иргэдийн Төлөөлөгчдийн Хурлын XI хуралдаанаар ИТХ дахь МАН-ын бүлгээс Налайх дүүргийн Засаг дарга Хасбазарын Болдбаатарыг огцруулах санал оруулсныг төлөөлөгчдийн олонх нь дэмжлээ. Ингэснээр дүүргийн Засаг дарга Х.Болдбаатар албан тушаалаасаа огцорлоо. Та бүхэнд Засаг дарга Х.Болдбаатарыг огцруулсан үндэслэлийг хүргэе.

ЗАСАГ ДАРГЫГ ОГЦРУУЛАХ ҮНДЭСЛЭЛ

Иргэдийн Хурлын Эрхэм Төлөөлөгчид өө.

Дүүргийн Засаг дарга Х.Болдбаатар нь Налайх дүүргийн Засаг дарга болоод даруй 2 жил болох гэж байна. Энэ хугацаанд төрөлх дүүргийнхээ төлөө, ард иргэдийнхээ амьжиргаа, эрүүл, аюулгүй орчинд амьдрах, дүүрэгт ирсэн хөрөнгө оруулалтыг орон нутагтаа шингээх, төрийн албыг чадавхжуулах, иргэдийн санал хүсэлтийг шийдвэрлэх зэрэг ажил хангалтгүй хийгдэж ирснийг иргэд бухимдан шүүмжлэх боллоо. Иргэдийн хүлээлт их байсан боловч бодитой үр дүн гаргаж чадсангүй.

Иймд:

Налайх дүүргийн 2014 оны Нийгэм эдийн засгийн зорилтын хэрэгжилтийг ИТХ дахь Монгол Ардын Намын бүлэг “Хангалтгүй” гэж дараах үндэслэлүүдээр дүгнэж байна.

 Үүнд:

1. Дүүргийн Засаг даргын бүрэн эрхийн хүрээнд хэрэгжүүлсэн 2013 оны Орон нутгийн хөгжлийн сангийн 2 тэрбум 79 сая төгрөгөөр хийгдсэн ажлууд нь туйлын хангалтгүй,хариуцлагүй,тооцоо судалгаа, зураг төсөлгүйн улмаас 324 сая төгрөг эргэн татагдсан. Эргэн татагдсан 324 сая төгрөгийг 2014 онд нөхөн авчирна хэмээн Иргэдийн Төлөөлөгчдийн чуулганд та амлаж, дүүргийн 2013 оны эдийн засаг нийгмийн зорилтын биелэлтийг “Хангалттай” хэмээн үнэлүүлсэн. Гэвч таны амласан дээрх 324 сая төгрөг өнөөдрийг хүртэл дүүрэгт ирсэнгүй. 2014 оны хөрөнгө оруулалтаар батлагдсан 2 тэрбум 502 сая төгрөгнөөс 1,5 тэрбум төгрөгний ажил хийгдсэн гэж дүүргийн ЗДТГ-ын Төрийн сангийн хэлтсээс мэдээлэл өгсөн бөгөөд үлдсэн 1 тэрбум төгрөгний санхүүжилт орж ирэх эсэх нь тодорхой бус байна. Дүүргийн 2015 оны төсвийг нийслэлийн ИТХ-аар хэлэлцэж байх чухал өдрүүдэд эрхэм Засаг дарга Х.Болдбаатар та БНХАУ-руу явсан нь дүүргийн нийт иргэдийн ирэх жилийн хувь заяаг хөсөр хаясан үйлдэл гэж дүүргийн ИТХ-ын МАН-ын бүлгийн зүгээс үзэж байна. Таны энэ увайгүй үйлдлийн үр дүнд 2014 оны дүүргийн Орон нутгийн хөгжлийн сангийн дутуу санхүүжилт болох дээрх төгрөгийг 2015 оны санхүүжилтээр нөхөн олгохоор болсон ч үнэндээ 2015 онд Налайх дүүргийн Орон нутгийн хөгжлийн санд хуваарилагдсан 1,9 тэрбум төгрөгнөөс танан үлдээж, 1 тэрбум орчим төгрөг л дүүрэгт ирэхээр болжээ. Энэхүү үнэнийг Та биднээс ч, иргэдээсээ ч нуух аргагүй.

Энэ нь дүүргийн Засаг дарга, түүний дэргэдэх байгууллагуудын ажлын хариуцлагатай шууд холбоотой гэж бид үзэж байна. Энэ талаар Засаг дарга та туйлын хангалтгүй ажиллаж ирлээ.

2. 2013-2014 онд манай дүүрэгт гэмт хэрэг 30 хувиар өсөж, олныг хэртхийлгэсэн онц ноцтой гэмт хэрэг удаа дараа гарлаа. Дүүргийн удирдлага, гэмт хэргээс урьдчилан сэргийлэх зөвлөл туйлын хангалтгүй ажиллаж, хууль хүчний байгууллагын уялдаа холбоо муу байгааг иргэд сонгогчид байнга сануулж байна. Дүүргийн хэмжээнд ажилгүйдэл ихэссэнээс ард иргэдийн бухимдал ихсэж, гэр бүлийн орчинд болон гудамжинд архидах явдал их байна. Архичдын бүлэг гэхээр хүмүүс дүүргийн бүх хороодод бий болж ард иргэдэд айдас түгшүүр төрүүлсээр байхад дүүргийн Засаг даргын зүгээс бодитой арга хэмжээ авахгүй байна. Нийгмийн аюулгүй байдлыг хангаж, иргэдийн амар тайван амьдрах нөхцөл бүрдүүлэх чиглэлээр Засаг дарга түүний дэргэдэх байгууллагууд өнөөгийн шаардлагад хүртэл ажиллаж чадахгүй байгаадаа ямар ч дүгнэлт хийхгүй байгаад бид харамсаж байна.

3. Дүүргийн иргэдийн төлөөлөгчдийн хурлын тэргүүлэгчдийн гаргасан тогтоолуудыг удаа дараа зөрчиж, өөрийн дур зоргоор шийдвэр гаргаж ирсэн нь нутгийн өөрөө удирдах ёсны халдашгүй бүрэн эрхийг бүдүүлгээр зөрчиж улмаар хуулийг уландаа гишгэдэг буруу зуршил дүүргийн хэмжээнд тогтож байна. Ингэснээр Монгол улсын хуулийг гууль болгож аливаа асуудлыг улс төржин намчирхаж, үзэмжээрээ шийдвэрлэн дур зоргоороо аашилдаг буруу зуршил тогтож байгаа нь аюултай гэж бид үзэж байна.

4. Дүүргийн ИТХ-аас жил бүрийн Газар зохион байгуулалтын төлөвлөгөөг баталж, хэрэгжүүлэхийг Засаг даргад үүрэг болгодог. Гэтэл энэ үүргээ үл ухамсарлан ИТХ-аас батлаагүй газруудад дур мэдэн газар олгосоор байна. Дүүргийн Засаг дарга хууль бус захирамж гарган өөрсдийн танил тал, найз нөхөд, намын гишүүддээ газар олгох асуудал улам гаарлаа. Ард иргэдэд энэ талаар ямар нэг мэдээлэл алга. Улаанбаатараас Цайз зах руу явдаг байсан хуучин замыг та дур мэдэн бусдад олгосон. Гэтэл зарим иргэдэд газар олгохгүй байгаа нь хууль зөрчихдөө хүртэл ялгаварлан гадуурхаж иргэдээ алагчлан үзэж байгаа бусармаг хууль бус үйлдэл гэж бид үзэж байна. Зөвхөн Засаг даргын 2014 онд гаргасан захирамжны 60-80 хувь нь газартай холбоотой захирамж байсан нь таны сонирхол юунд төвлөрч байгааг бэлхнээ илтгэж байна. Гэтэл хашааны газар авч чадахгүй байгаа олон иргэд бухимдал тээсээр, та бүхнийг шүүмжлэн бухимдаж байна.

5.Төрийн албаны зөвлөлөөс таны томилгоо буруу байгааг анхааруулсан бичиг ирсээр байтал та үл тоон одоо хүртэл хууль бус томилгоотой албан тушаалтнуудаа ажиллуулсаар байна. Монгол улсын Засаг захиргаа, нутаг дэвсгэрийн нэгж, түүний удирдлагын тухай хуулийн Хурлын төлөөлөгчийн бүрэн эрхийн тухай 12.1.7-д заасны дагуу МАН-ын бүлгээс албан ёсоор өгсөн албан бичигт таны гадаад дотоод томилгоо, аялал зугаалга, Засаг даргын нөөц сангийн талаар хариу шаардсан бичигт одоо хүртэл ямар ч хариу ирүүлээгүй байна. 2012 онд Дүүргийн удирдлагуудыг жилд нэг л удаа гадаад томилолт эдлэхээр үүрэг болгосон гэж хэвлэл мэдээллээр зарласан. Гэтэл сүүлийн хоёр жилд дүүргийн удирдлагуудын гадаад томилолт тоогоо алдаж, удаа дараалсан өргөн бүрэлдэхүүнтэй гадаад айчлалыг хийдэг боллоо. Тэр бүү хэл Засаг дарга та өөрийнхөө хүүхдийг эргэх нэрийдлээр Солонгос улсад сар бүр хэд хэдэн удаа явж байгааг юу гэж тайлбарлах вэ? Хамгийн сүүлд та Налайх дүүргийг хот болгох талаар хэлэлцүүлэг хийж байхад БНХАУ-д Тэрэлжийг аялал зуучлалын төв болгоно гээд л яриад явж байсан. Хийж байгаа ажлууд чинь хоорондоо уялдаа холбоо байхгүй, татвар төлөгчдийн мөнгийг салхинд дэмий үрсэн үйлдэл болоод байна. Энэ айлчлалууд дүүргийн хөгжилд ямар тустай, ард иргэдэд ямар дэмтэй болохыг тайлбарлах нь зүйтэй гэж үзэж байна. Ард иргэдийн татварт төлсөн олон сая төгрөг зөвхөн Дүүргийн удирдлагуудын аялал зугаалганд зарцуулагдсаар байгааг бид хатуу эсэргүүцэж байна.

6. Дүүргийн 2014 оны эдийн засаг, нийгмийн зорилтын хэрэгжилтийг үнэлсэн үнэлгээ нь Засгийн газрын 2013 оны 322 дугаар тогтоолын хавсралтаар батлагдсан үнэлэх журмыг ноцтой зөрчиж илт худлаа дүгнэсэн нь дүүргийн иргэдийг төлөөлөн суугаа төлөөлөгчид биднийг басамжилсан үйлдэл боллоо.

7. Таны гаргасан ээлжит алдаатай шийдвэрийн үр дүнд Налайх дүүрэг 15 га газраа Тэлмэн констракшн гэх компанид ямар ч үнэ төлбөргүй өгч 6000 айлын орон сууц барина, 2014 оны 1 дүгээр улиралд эхний ээлжийн 720 айлын орон сууц ашиглалтад орно хэмээн иргэдийг хуурч хэдэн зуун иргэдийг залилсан үйлдэл нь эгэл иргэдээ бус эрх мэдэлтэй, эд хөрөнгөтэй хүмүүст илүү тал засч ажиллаж байгаагийн бодит илрэл юм. Шинэ Налайх хэмээх сүржин нэртэй энэ хорооллыг нэг ч орон сууц ашиглалтанд ороогүй нь бидний өмнө илхэн байна.

Иймд таны гаргасан шийдвэр, үйлдлүүд нь Налайх дүүргийн, Налайхын нийт иргэдийн эрх ашигт харшилж байгаа тул таныг Налайх дүүргийн Засаг дарга хэмээх эрхэм хариуцлагатай үүргийг гүйцэтгэх боломжгүй хэмээн дүгнэж байна.

Эрхэм төлөөлөгчид өө

Эдгээр үндэслэлийг бодитой авч үзэж, эрүүл шударга, иргэд олон түмний хүлээлтэд нийцсэн, улс төржиж намчирхалгүй зөв шийдвэр гаргана гэдэгт та бүхэнд найдаж байна.