Төрийн ордонд “Шударга ёс” эвслийн бүлэг хуралдаж дууслаа. Ингээд бүлгийн хурлын талаарх мэдээллээ бүлгийн дарга Н.Батцэрэг болон бүлгийн дэд дарга Э.Баянсэлэнгэ нар хийсэн юм. Өнөөдөр тус бүлгийн хурлаар хоёр гол асуудлыг хэлэлцсэн байна. Эвслийн бүлгийн эхний хэлэлцсэн  асуудал нь Ерөнхийлөгчөөс УИХ-д өргөн барьсан Нийтийн сонсголын тухай хуулийн төсөл юм. Уг хуулийн төсөлтэй холбоотойгоор Ерөнхийлөгчийн хуулийн бодлогын зөвлөх Ч.Өнөрбаярыг урьж тодорхой мэдээлэл авчээ. Эцэст нь тус бүлгийн олонх гишүүд Нийтийн сонсголын тухай хуулийн төслийг бүхэлд нь дэмжих нь зүйтэй гэж үзжээ. Гэхдээ бүлгийн гишүүд уг хуулийн төсөлтэй холбоотой чухал зүйлүүдийг нэмэх, зарих нэг хэсэгт өөрчлөлт оруулах тухай санал дүгнэлтээ байнгын хороод болон УИХ-д мэдүүлэхээр болжээ.
                      Харин дараа нь эвслийн бүлгээр УИХ-ын гишүүн Г.Уянгын өргөн барьсан Барьцаалан зээлдэх журмаар зээл олгох тухай хуулийн төслийг хэлэлцээд бүхэлд нь дэмжих нь зүйтэй гэж үзлээ. Тэд эдийн засаг хямралтай байгаа энэ цаг үед иргэд барьцаалан зээлдүүлэх төв буюу ломбарданд өөрийн эд зүйлсээ тавьж мөнгө авдаг. Харин тэрхүү ломбард нь зарим талаараа иргэдийн эрх ашгийг зөрчиж байгаа тохиолдол олонтаа гарч байгаа учраас уг хуулийн төслийг санаачилсан нь нүдээ олсон зүйл гэж үзжээ.
                    Өнөөдрийн мэдээллийнхээ төгсгөлд “Шударга ёс” эвслийн бүлгийн дарга Н.Батцэрэг “Улс орны эдийн засгийн нөхцөл байдал хүндрэлтэй байгаа энэ үед төрийн байгууллагууд төсвийн мөнгөөр шинэ жил болон баяр ёслолын арга хэмжээ зохион байгуулах нь тохиромжгүй. Тиймээс энэ талаарх уриалгаа зохиох байгууллагуудад мэдэгдэнэ” гэсэн юм.