“ДЦС-I\/’’-ын хүчин чадлыг нэмэгдүүлэх төсөл хэрэгжиж дууссан тул нээлтийн үйл ажиллагааг өчигдөр зохион байгууллаа. Ингэснээр 250 мянган өрхийг шинээр цахилгаанаар, 15 мянган өрхийг дулаанаар хангах боломжтой болжээ. Мөн нийслэлийн хэмжээнд 2017 он хүртэлх хугацааны цахилгаан, дулааны хэрэглээг хангах найдвартай эх үүсвэртэй болов.

Шинээр суурилуулсан турбиныг улсын төсвийн хөрөнгө болон Хөгжлийн банкнаас олгосон 70 сая ам.доллараар санхүүжүүлсэн байна. Одоогийн мөрдөж буй тарифаар бодоход жилийн 25,8 тэрбум төгрөгийн бодит орлого төвлөрүүлэх тооцоо бий. Тиймээс уг өргөтгөлийн хөрөнгө оруулалтын өртгийг 4-7 жилийн дотор бүрэн нөхөх боломжтой гэж “ДЦС-IV” ТӨХК-ийн гүйцэтгэх захирал Ж.Осгонбаатар танилцууллаа. Дашрамд дурдахад, өргөтгөлийн ажилд ОХУ-аас 150 мэргэжилтэн нийт 300 гаруй ажилтан гар бие оролцжээ. Түүнчлэн ОХУ-аас том оврын 71 автомашин, 55 вагон болон нисэх онгоцоор нийт 350 орчим баглаа боодол бүхий тоног төхөөрөмж, сэлбэг материал нийлүүлсэн байна.