Үндэсний дуу бүжгийн эрдмийн чуулгын уран бүтээлчид ардын уран зохиолч П.Бадарч, төрийн соёрхолт Д.Төрбат нарын цомнолоор “Оройн дээд” түүхэн дуурийг анх удаа толилуулах гэж байгаа билээ. Зургаан хоногийн дараа буюу үндэсний эрх чөлөөний өдрөөр нээлтээ хийх уг бүтээлийг үзэгчдийн хүртээл болгоход бэлэн болжээ. Энэхүү бүтээлд 70 гаруй жилийн турш социалист агуулга үзэл сурталын дүнд гуйвуулагдан бүдгэрсэн 1911 оны арванхоёрдугаар сарын 29-нд болсон эрх чөлөө, тусгаар тогтнолын төлөөх үндэсний хувьсгалын үнэн түүхийг өгүүлэх аж. Гурван бүлэг, долоон үзэгдэлтэй дуурийн энэ бүтээлд ҮДБЭЧ-ын хөдөлмөрийн баатар, зууны манлай уртын дууч Н.Норонбанзадын нэрэмжит дуу анги, Үндэсний хөгжмийн их найрал, Зууны манлай бүжиг дэглээч Ц.Сэвжидийн нэрэмжит бүжиг анги зэрэг 200 гаруй уран бүтээлч оролцож байгаа бөгөөд найруулагчаар тус чуулгын ерөнхий найруулагч Д.Ганболд, хөгжмийн зохиолчоор залуу хөгжмийн зохиолч М.Бирваа, удирдаачаар ерөнхий удирдаач Н.Буянбаатар, хормейстр Ц.Буян-Орших, бүжиг дэглээч Х.Хашхүү, О.Цэцгээ нар ажиллажээ.