МҮЭХ-ны ерөнхийлөгч Х.Амгаланбаатар өчигдөр хэвлэлийнхэнд мэдээлэл хийсэн юм . Тэд УИХ-ын нэгдсэн чуулганы өнгөрсөн баасан гарагийн хуралдаанд Ерөнхий сайд Ч.Сайханбилэгийн илэрхийлсэн зарим байр суурьтай иргэдийн эрх ашгийг хамгаалж ажилладаг байгууллагын хувьд санал нийлэхгүй байгаа ажээ. Хэдийгээр эдийн засгийн нөхцөл байдал хүнд байгаа энэ үед хэмнэлт хийхийг дэмжиж байгаа ч ард иргэдийн халаас руу өнгийхгүй байхыг МҮЭХ-ноос Ерөнхий сайдад санууллаа. Тодруулбал төсөв хэмнэх нэрээр ажлын байрны цомхтгол хийх, цалин, тэтгэвэр нэмэхгүй байх, Хүүхдийн мөнгө, одонгийн мөнгийг хасах, төрийн албаны 180 мянга гаруй ажилтны нийгмийн асуудлыг хөндөхийг МҮЭХ дэмжихгүй байгаа аж. Тиймээс тэд ойрын өдрүүдэд гурван талт хэлэлцээрийг хийхээр шаардаж байна. Хэрэв уг хэлэлцээрээр асуудлыг нааштай шийдэхгүй бол МҮЭХ хэлэлцээрийн нэг тал болох үүргээсээ татгалзаж, олон нийтийн төрөл бүрийн арга хэмжээг зохион байгуулна. Бүр цаашлаад хамтын маргаанаа шүүхийн зарчмаар шийдвэрлүүлнэ гэлээ. Мөн тэд энэ сарын 19-нд Хөдөлмөрийн сайд С.Чинзоригт хандан Хөдөлмөр, нийгмийн зөвшилцлийн гурван талт хэлэлцээрийн бэлтгэлийг ойрын хугацаанд хангаж ажиллахыг хүсч, албан тоот хүргүүлжээ.