Өнөөдөр Монгол Улсын Ерөнхийлөгч Цахиагийн Элбэгдорж, МЗХ-ны Ерөнхийлөгч Аюушийн Мөнхбатыг хүлээн авч уулзаж Дэлхийн Залуучуудын Ассемблейн дэд ерөнхийлөгч болсонд албан ёсоор баяр хүргэлээ. Дэлхийн залуучуудын ассемблейн Ази хариуцсан дэд ерөнхийлөгчөөрмонгол хүн анх удаагаа сонгогдсон нь угхолбоо улс орноо олон улсад төлөөлөх чадвартай нөлөө бүхий байгууллага болохыг илтгэж байгаа бөгөөд Монгол улс эдийн засгийн болон хүний хөгжлөөрөө Азийн орнуудын дунд тэргүүлэгч улсын тоонд зүй ёсоор орох болсны илрэлхэмээн үнэлж, улс эх орныхоо нэрийг дэлхийд түвшинд гаргаж, Монголын залуус хүчтэй, мэдлэг боловсрол, удирдах ур чадвараараа олон улсад өрсөлдөхүйц болсны тод жишээ хэмээн цохон тэмдэглэсэн байна.

Өнгөрсөн 12-р сарын 7-11-ний өдрүүдэд Албани Улсын Тирана хотноо Дэлхийн Залуучуудын Ассемблейн чуулга уулзалт “Залуучуудын Манлайлал-Өнгөрсөн ба Ирээдүй”сэдвийн дор болж өнгөрсөн юм. Чуулганы үеэр 2014-2018 онд шинээр ажиллах удирдах зөвлөлийн бүрэлдэхүүнд Монголын Залуучуудын Холбооны ерөнхийлөгч Аюушийн Мөнхбат нэр дэвшиж, чуулганы нийт оролцогчдын олонхын саналаар Азийн асуудал хариуцсан дэд ерөнхийлөгчөөр сонгогдсон таатай үйл явдал тохиосон нь энэ билээ.

4 жилд нэг удаа болдог уг чуулганы үеэр сонгогддог удирдах зөвлөл нь ерөнхийлөгч, тив  хариуцсан 5 дэд ерөнхийлөгчөөс бүрддэг  ба тэдгээр нь нарийн бичгийн газрын үйл ажиллагааг удирдан чиглүүлж хяналт тавьж ажилладаг аж.

Дэлхийн 120 гаруй улсыг эгнээндээ элсүүлсэн  Дэлхийн Залуучуудын Ассемблей нь 1949 онд байгуулагдснаас хойш Канад, Гвиней, Их Британи, Перу, Итали, Австри, Дани, Малайзаас ерөнхийлөгчөөр нийт 12 хүн,  Ерөнхий Нарийн Бичгийн Даргаар Франц, Их Британи, Швед, Энэтхэг, Боливи, Гана, Финлянд, Зимбабве, Албани Улсаас нийт 11 хүн сонгогдон ажилласан байна.