Сүүлийн үед С.Ганбаатар, Г.Уянга нарын гишүүд нэгдэж шинэ нам байгуулах гэж байгаа талаарх шум саарал ордноор нэг тарж байгаа. Өөрөөр хэлбэл, Монголын улс төрд шинэ хүчин нэмэхгүй бол болохоо байж гэх олны үзэл дээр дөрөөлж шинэ намын сураг гараад ирж байгаа нь энэ. Монголын улс төр сөрөх хүчингүй болсон энэ цаг үед уг орон зайг нөхөх хүчтэй нам гарч ирснээрээ байдлыг өөрчилж ч мэдэх юм.

Тэгвэл шинэ намд “мөнхийн шүүмжлэгч” байсан улс төрчид хурдтайгаар орж ирж байгаа сурагтай.   Ийнхүү Монголын улс төрд дахин сөрөх хүчний орон зай үүсч байна гэдгийг олж харсан нөхдүүд нийлж шинээр нам байгуулахаар ил, далд ярилцаад эхэлжээ. Энэ намд элсэх гэж байгаа хүмүүсийн нэр ч эхнээсээ тодорч байна. Тухайлбал, С.Ганбаатар, Х.Баттулга, Г.Уянга, Ж.Батзандан, О.Магнай, Х.Болорчулуун, Ц.Даваасүрэн гэсэн нөхөд нэгдэх нь. Том сөрөх хүчин болж байсан МАН парламентэд нэгдсэнээр тэд ийн сөрөх хүчин болохоор шийджээ.

Тэгвэл тэднийг МАН-аас ч сайн тэмцэгч, жагсагч, шүүмжлэгч гэж хэлэх хүмүүс олон байгаа юм. Өөрөөр хэлбэл, тэд төр байгуулснаас илүү сөрөх хүчин болж шүүмжлээд хяналтаа тавиад явж байвал зүгээр гэж харах хүмүүс цөөнгүй байна.
Нам байгуулахаар зэхэгчдээс цухас дурдвал,

Г.Уянга бол олон жилийн турш М.Энхсайханыг дагасан. Гэвч өдгөө М.Энхсайхантай бодлого таарахаа больсон гэдгийг бүгд мэдэж байгаа. Харин дээрх нэр дурдагдаж байгаа нөхөдтэйгээ хуучны бугшил нэгтэй хүн.

 Ж.Батзанданг 2016 онд аль ч нам дэмжихгүй гэдэг нь тодорхой болсон. Тиймээс АН-аас гарах нь тодорхой. Ер нь Ж.Батзандан, О.Магнай хоёрт АН сүжиггүй байгааг хөндлөнгийн эх сурвалжууд хэлдэг.  Тэднийг долоон сарын 1-нд шоронд орохоос айгаад АН руу гүйгээд орчихсон гэх хүмүүс ч байдаг.

О.Магнайг АН-ынхан үндсэндээ албан тушаалаас нь буулгах нь тодорхой болчихсон байсан гэдэг. Уг тохироо аль хэдийнэ явчихсан байсныг ч эх сурвалжууд хэлж байна. Мөн түүний ажлын арга барилд асуудалтай зүйл олон байгаа төдийгүй дарангуйлагч шинжтэй үйл ажиллагаа явуулж байна гэж шүүмжлэх хүн ч олонтаа. Шинэ ерөнхий сайд Ч.Сайханбилэг  гарч ирээд ч О.Магнайтай хамтарч ажиллаж чадахгүй гэдгээ хэлсэн сурагтай. Тиймээс О.Магнай,  У. Хүрэлсүхээс илүү АН-аас шалтгаалж ажлаа өгсөн гэх юм. Өөрөөр хэлбэл, уснаас хуурай гарах гээд өөрөө ажлаа өгсөн гэж ярих ч хүмүүс байна.  Уг нь О.Магнайг ажил дээр нь үлдээвэл үлдээх байсан ч АН-ынхан түүнийг авч үлдэхийн төлөө хуруу бүү хэл хумсаа ч хөдөлгөөгүй. Тиймээс тэрбээр ийн  зайгаа барих болсон бололтой.
Бие даагчдаас Х.Болорчулуун, Ц.Даваасүрэн, С.Ганбаатар гурав нийлээд “Монгол хүний төлөө” гэх лого маягийн зүйл гаргаж ирчихээд хөдөлгөөн болоод яваад байгаа. Цаашлаад Ц.Даваасүрэнгийн хувьд 2016 оны сонгуульд аль нэг намд шингэж байж өрсөлдөх  бодолтой байгааг учир мэдэх хүмүүс андахгүй. Тухайлбал, АН-д орох бодолтой байгаа гэх хүмүүс бий.

Улмаар дээрх гурван бие даагч маань 2012 оны сонгуулиар бид гуравт нэг яам өгчих. Тэгвэл бид гурав АН-д элсэж орно гэж ярьж явсан талаарх шум ч байдаг. Гэвч тэдэнд яам өгөөгүй. Тодорхой нэг албан тушаал өгсөн. Тухайлбал, Иргэний нисэхийн газар, Монголрос цветмет гэх мэт.

Тиймээс тэд үргэлжлүүлэн тэмцэж байхаар болсон байхыг үгүйсгэхгүй гэж улс төр сонирхогч зарим нэг нь хэлж суух жишээний. Тэгэхээр орон зайгүй болсон бие даагчид нам байгуулая гэсэн саналыг түрүүлж гаргасан байх гэсэн хардлага ч байгаа юм.

Түүнчлэн, намын даргаараа С.Ганбаатарыг томилно гэдэг яриа ил, далд яригдаж байгааг дээр дурдсан.

 С.Ганбаатар бол эрх баригдчыг жинхэнэ “айлгаж” байгаа улс төрч. Нөхөр  2017 оны Ерөнхийлөгчийн сонгуульд өрсөлдөх бодолтой яваа. Тэрбээр  өөрөө л нам байгуулахгүй бол дэмжигдэхгүй.  Тиймээс С.Ганбаатар ингэхээс өөр аргагүй байдалд хүрсэн ч байж болох юм. 

Нөгөө талаас С.Ганбаатар дандаа иргэний нийгмийнхнийг намдаа татаж магадгүй юм. Мөн МАХН-аас ч хүн оруулах сурагтай.