УИХ-ын чуулганы хуралдаанаар Санхүүгийн зохицуулах хорооны дарга, гишүүдийг чөлөөлөх, томилох тухай асуудлыг хэлэлцэж эхэллээ. Тодруулбал, Санхүүгийн зохицуулах хорооны дарга Д.Баярсайхан, тус хорооны орон тооны гишүүн Г.Хэрлэн, Б.Даажамба, орон тооны бус гишүүн Б.Лхагвасүрэн, Б.Батбаяр нар үүрэгт ажлаас чөлөөлөгдөх хүсэлтээ ирүүлсэн бөгөөд дээрх хүсэлтийг Эдийн засгийн байнгын хороогоор хэлэлцээд  гишүүдийн олонх чөлөөлөхийг дэмжсэн юм. Харин Д.Баярсайханы оронд З.Нарантуяаг нэр дэвшүүлсэн билээ. Ингээд дээрх хүмүүсийг чөлөөлөх, томилох эсэх асуудлыг одоо чуулганы хуралдаанаар эцэслэн шийдэх гэж байна.

Хэлэлцэж буй асуудалтай холбогдуулан одоо гишүүд асуулт асууж, үг хэлж байна. Тодруулбал, УИХ-ын Ц.Нямдорж "Улс төрийн шахалтаар энэ хүмүүсийг ажлаас нь чөлөөлүүлж байна. Ийм зүйл байж болохгүй"

Мөн гишүүн З.Баянсэлэнгэ “Чөлөөлөгдөж буй гишүүдийн гурав нь орон тооны, хоёр нь орон тооны бус юм байна. Аудитын шалгалтын дүнгээс болж өөрсдөө чөлөөлөгдөх өргөдлөө өгсөн юм гэж ойлгож байгаа. Зөрчил гаргасан юм бол хариуцлагын асуудал яригдах ёстой” гэв. 

Байнгын хорооны дарга Б.Гарамгайбаатар эдгээр эргэлзээнд хариулт өгч “СЗХ-ны гишүүд өөрсдөө өргөдлөө өгсөн тул оруулж ирсэн” гэв. Мөн З.Энхболд “Санхүүгийн зах зээлийн гүйлгээний дүнг хараад үз л дээ. Ямар бага хэмжээний гүйлгээ явагдаж байгааг. Энэ нь л ажлын үзүүлэлт шүү дээ” гэсэн юм. Үүнийгээ цааш нь тодруулж,  “санхүүгийн зохицуулах хороо 7 гишүүнтэй. Үүнээс Монголбанкнаас төлөөлөн ажиллаж буй хоёр гишүүн нь үндсэн ажлаа өгсөнтэй холбоотойгоор төлөөлөх орон тооны хоёр нь өөрчлөгдөж байгаа, мөн ажлаа муу хийснээ хүлээн зөвшөөрч чөлөөлөгдөх өргөдлөө өгсөн гишүүд байгаа болохоос биш улс төрийн ямарваа нэг шийдэл биш” хэмээсэн байна.

Ц.Нямдорж өөрийнхөө бодлоос ухарсангүй. Тэрээр “Улс төрөөс хараат бус байх ёстой байгууллагууд улс төрийн байгууллага болох нь. Аудитын байгууллага нь төсвийн зарцуулалтад хяналт тавих ёстой л байгууллага. Үндсэн хуулийн зарчим зөрчигдлөө” гэв.