УИХ-ын чуулганы үдээс хойшхи хуралдаанаар Монголын Үндэсний олон нийтийн радио, телевизийн Үндэсний зөвлөлийн зарим гишүүнийг томилох тухай асуудлыг хэлэлцээд нэр дэвшигчдийг дэмжлээ.  

 Тус зөвлөлд нийт 7 квот гарсан байгаа бөгөөд үүнд нийт 40 гаруй хүн өрсөлдсөн байна.

 Тэдгээрээс  

Ерөнхийлөгчийн тамгын газраас нэр дэвшүүлсэн Д.Нямсамбуу
Засгийн газраас нэр дэвшүүлсэн Б.Золбаяр /УИХ-ын даргын зөвлөх асан/
Засгийн газраас нэр дэвшүүлсэн З.Энхболд /Н.Алтанхуягийн багт ажиллаж байсан/
УИХ-ын тамгын газраас нэр дэвшүүлсэн Д.Цэндсүрэн /Хуульч/
УИХ-ын тамгын газраас нэр дэвшүүлсэн Б.Энхмандах /Элчин сайд асан/
УИХ-ын тамгын газраас нэр дэвшүүлсэн Д.Оюун-Эрдэнэ /Өнөөдөр сонины тоймч/
УИХ-ын тамгын газраас нэр дэвшүүлсэн Батж.Батбаяр /УИХ-ын гишүүн асан/ нар нэр дэвшсэнийг байнгын хороогоор дэмжээд одоо чуулганы хуралдаанаар хэлэлцсэн нь энэ юм.

Энэ үеэр УИХ-ын дарга З.Энхболд "Та бүгд хэцүүхэн газар очиж байгаа. Төсвийн 50 хувь нь алга болчихсон. Архидалт нь хэтэрчихсэн. 100 хүний гаргаж болох эфирийг 700 хүн явуулж байгаа гэх мэт маш хэцүү газар очиж байна. Та бүхэн үүнийг цэгцлээрэй. Байнгын хороотойгоо холбоотой байж сайн ажиллаарай. Ядаж хулгайгаар кино гаргахаа болиулах хэрэгтэй. Дэндүү ичмээр юм даа" гэсэн юм.