УИХ-ын нэгдсэн чуулганы хуралдаанаар Тамхины хяналтын тухай хуульд нэмэлт, өөрчлөлт оруулах тухай буюу утаат тамхи татах зөвшөөрөгдсөн цэгийг тодорхойлж, байгуулах эсэх асуудлыг хэлэлцэж дэмжлээ.

Хэлэлцэж буй  УИХ-ын гишүүд хууль санаачлагчаас асуулт асууж, санал солилцлоо.

Тодруулбал, УИХ-ын гишүүн С.Баярцогт "Аж ахуй нэгж, албан байгууллагад тамхины цэг байгуулах талаар ойлгомжгүй зүйл байна. Хуулиндаа аж ахуй нэгж, албан байгууллага дотор тамхины цэг байгуулна гэсэн байх юм. Баар, цэнгээний газар бол болно. Гэтэл албан байгууллага дотор тамхины цэг байгуулж боломгүй санагдаад байна. Мөн төрийн байгууллага тамхины цэг байгуулахдаа төсвөө төрөөс гаргах юм уу" гэж хэлээд “Төсвийн хөрөнгөөр тамхины цэг байгуулж болохгүй” гэсэн заалтыг хуулийн төсөлд оруулах ёстой гэсэн санал гаргасан нь олонхийн дэмжлэг хүлээлээ.

Ингээд УИХ-ын гишүүдийн олонхи утаат тамхи татах зөвшөөрөгдсөн цэгийг тодорхойлж, байгуулах тухай асуудлыг дэмжиж, хуулийн төслийг Нийгмийн бодлого, боловсрол, соёл шинжлэх ухааны байнгын хороонд хэлэлцүүлэхээр шилжүүллээ.