Сүүлийн үед манай улс төрчид авлигаас ихээхэн айдаг болсон. Бас ч гэж бэлэг сэлтэд ухамсартай хандаж эхэлсэн. Учир нь цалингаас өндөр үнэтэй бэлэгийг төрд хүлээлгэн өгдөг жишиг тогтоод байгаа. Хэрэв цалингаас үнэтэй бэлэг хүлээн авчихвал авлига авсан болно. Тиймээс улс төрчид бэлэгнээс цэрэвдэг соёлтой болоод хэдэн оныг үдэв. Энэ жишигийн дагуу ССАЖ-ын сайд, Монгол-Мъянмарын парламентын бүлгийн дарга Ц.Оюунгэрэл өөрт нь өгсөн чулуун зүүлтээс татгалзсан юм. Түүнд уг зүүлтийг Монгол-Мъянмарын парламентын бүлгийн даргын хувьд Мъянмарын парламентын бүлгийн дарга өгсөн байдаг. Ц.Оюунгэрэлд уг зүүлтнээс татгалзах хоёр шалтгаан байж. Нэгд уг бэлэг цалингаас өндөр үнэтэй байх магадлалтай. Хоёрт зүүлтийг хувь хүн Ц.Оюунгэрэлд биш Монгол-Мъянмарын парламентын бүлгийн даргын хувьд өгсөн. Тиймээс төрд өгөх эсвэл үнэлгээ тогтоох ёстой гэж шийдсэн юм.
Ингээд Ц.Оюунгэрэл уг чулуун зүүлтийг төрийн ёслолын албанд илгээсэн байдаг. Төрийн ёслолын алба чулуун зүүлтийг хүлээн авч ГХЯ-нд хүлээлгэн өгчээ. Учир нь ГХЯ гадныханы өгсөн бэлэгийг үнэлэх ажиллагаанд оролцдог аж. Ц.Оюунгэрэл сайд чулуун зүүлтээ хүлээлгэн өгөөд таван сар мартчихжээ. Нэг өдөр чулуун зүүлтээ санасан тэрээр ГХЯ-ныхантай холбогдож чулуун зүүлтийн үнэлгээ хэд болсон талаар сонирхосон бололтой. Сонирхолтой нь ГХЯ уг чулуун зүүлтийг алга болгочихсон. Хайгаад олохгүй байгаа гэж мэдээлжээ. Өөрөөр хэлбэл асар үнэтэй гэж яригдсан чулуун зүүлт ГХЯ-нд очоод алга болжээ. Мъянмар бол сүүлийн үед ашигт малтмалаараа дэлхийд алдаршиж байгаа газар. Монголоос явсан хөрөнгө оруулагчид Мъянмарт очиж суурьсан. Тиймээс ашигт малтмалын өндөр үнэтэй бэлэгийг Мъянмарынхан гадныханд өгдөг гэдгийг дэлхий дахин мэддэг болсон.

Чулуун зүүлтээ алга болгосон Ц.Оюунгэрэл сайд хэсэгхэн бухимдаад орхижээ. Гэтэл асуудлыг ингэж орхиж болохгүй гэж УИХ-ын гишүүн Г.Уянга зөвлөж. Бас олон нийтэд дэлгэж орхисон. Шалтгаан нь чулуун зүүлтийг эрж сурахдаа биш ГХЯ-ныханы үнэн нүүр царайг олон нийтэд ил болгох ёстой. Төрийн нэрээр өгсөн бэлэгийг замд нь алга болгоно гэдэг байж болшгүй асуудал. Төрийн нэрээр ирсэн бэлэгийг музейд хадгалах ёстой. Тэгэхээр төрийн нэрээр ирсэн, музейн үзмэр болох үнэт зүйлийг алга болгосон хүмүүстэй хариуцлага тооцох ёстой. Сайд дарга, гишүүд нь тансаг бэлэгнээс татгалзаад байдаг. Түүнийг нь төрийн албанд ажилладаг жижиг гарууд алга болгосон нэрээр нь хувьдаа завшаад байж болохгүй гэдэг асуудал сөхөгдлөө. Ингээд уг хэрэгийг хуулийн байгууллагаар шалгуулахаар болсон байна. Асуудал дөнгөж хуулийн байгууллагад очсон учир ГХЯ-ныханыг шалгаж эхлэхээр болсон гэж эх сурвалж мэдээллээ. Ийнхүү Ц.Оюунгэрэл гишүүний сайд байхдаа авсан бэлэгээ төрдөө өгөх гэсэн санаархал ГХЯ-ныхны гараар ороод алга болсон гэх мэдээллийг энэ оны хамгийн хачирхалтай, инээдэмтэй, хэрэг гэж тодорхойлсон яриа газар авч байна.