УИХ-ын гишүүн, Хүнс хөдөө аж ахуйн сайд Р.Бурмаа УИХ-ын гишүүнээс татгалзах хүсэлтээ гаргасан талаараа өнөөдөр сэтгүүлчдэд албан ёсоор мэдэгдлээ. Учир нь тэрбээр УИХ-ын гишүүн Засгийн газрын гишүүнээр давхар ажиллахгүй байх хуулийн төслийг дэмжиж байгаагийнхаа хувьд ийм шийдвэрийг гаргажээ. Харин түүний хүсэлтэд намаас нь хариу өгөөгүй байна. Энэ талаар тэрбээр “Ерөнхийлөгчийн өргөн мэдүүлсэн давхар дээл тайлах хуулийн төслийг анхнаасаа дэмжиж байр сууриа илэрхийлж байсны хувьд, мөн Засгийн газрын гишүүн нь давхар дээлгүй байх ёстой гэж үзсний үндсэн дээр өргөдлөө гаргасан” гэлээ.

Тэрээр 2012 оны УИХ-ын сонгуульд намын нэрээр дэвшиж, УИХ-ын гишүүн болсон юм. Тиймээс УИХ болоод Ардчилсан нам түүний УИХ-ын гишүүний бүрэн эрхээсээ татгалзах хүсэлтийг хүлээн авсан нөхцөлд намын жагсаалтад эрэмбэлэгдсэн дараагийн хүн орыг нь залгах ёстой. Үүгээр бол Худалдаа хөгжлийн банкны гүйцэтгэх захирал Б.Мэдрээ УИХ-ын гишүүн болох юм.