Өнөөдөр МҮОНРТ-ийн Үндэсний зөвлөл хуралдаж, МҮОНРТ-ийн Ерөнхий захирлаар Ц.Оюундарийг томилсон.

Үндэсний зөвлөлийн хуралдаанд нийт 12 гишүүн оролцсон бөгөөд санал хураахад нэг хүчингүй санал гарсан байна. Үлдсэн 11 гишүүн буюу 91 хувь нь Ц.Оюундарийг Ерөнхий захирлаар томилохыг дэмжжээ. Ц.Оюундарь дөнгөж сая Үндэсний зөвлөлийн дарга Л.Пүрэвдоржоос тамгаа гардаж авлаа. Тэрбээр ажлаа авсан даруйдаа энэ сарын 2-ны өдрийн хуралдаанаар Үндэсний зөвлөлөөс гаргасан орон тооны цомхотголын ажлыг эхлүүлнэ гэдгээ мэдэгдлээ.

Тэрбээр мөн "Энэ байгууллага нь миний мэргэжлийн хувьд өсөж торнисон газар. Өнгөрсөн хоёр гаруй жилийн хугацаанд хөндлөнгөөс харж байхад энэ байгууллагыг орхиод явж болохгүй юм байна гэсэн хувь хүний дотоод сэтгэлийн дуудлага байсан. Нөгөө талаас 2015 оны төсөвт УИХ-ын гишүүд энэ байгууллагын төсвийг шууд 50 хувь хассан нь эдийн засгийн хувьд хүнд байдалд оруулж байгаа юм. Яг ийм үед нь сэтгэлийн дуудлагаар ирж байгаа.  Яагаад гэвэл улс орон болгонд Олон нийтийн радио, телевиз гэж байгууллага байдаг. Энэ нь өөрөө улс орны тусгаар тогтнолын баталгаа болж байдаг. Тийм болохоор үүнд онцгой анхаарах ёстой. Энэ нөхцөлд өөрийнхөө зүгээс чадах зүйлээ хийлгүй өнгөрөөх юм бол би хожмоо харамсах болов уу гэж бодож байна. Өмнө нь би МҮОНТ-ийн захирлаар гурав гаруй ажилласан. Тэр үед хийж бүтээхээр төлөвлөж, эхлүүлж байсан олон ажил маань зогсчихсон байгаа. Энэ бүхнийгээ үргэлжлүүлнэ. Олон жилийн түүхтэй, уран бүтээлийн арвин сан хөмрөгийг бүрдүүлж байгаа уран бүтээлчидтэй бүгдтэй нь хамтарч ажиллана. Олон жилийн туршид дарга солигдох бүрт удирдлагын бүтэц улам таргалж, данхайж байсан. Энэ тарган бүтцийг тураах ажлыг л нэн тэргүүнд хийнэ дээ. Харин уран бүтээлчдийг бол хөндөхгүй" гэж хэллээ.

Ц.Оюундарь нь 1993 онд Төр Нийгэм Судлалын Академийг Улс Төр Судлаач-Эдийн Засагч мэргэжлээр төгссөн бөгөөд тухайн үед МҮОНТ-д сурвалжлагчаар ажиллаж байсан юм. Мөн 1999-2001 онд Ийгл телевизийн дэд захирлаар ажилласан. 2006-2008 онд АНУ-ын Берклей хот дaхь Калифорнийн Их Сургуулийн Сэтгүүл Зүйн Дээд сургуулийг дүүргэж, "Сэтгүүл Зүйн Мастер"-ийн зэргийг хамгаалсан бөгөөд өнөөг хүртэл АН-ын генсекээр ажиллаж байсан юм.
 
Дашрамд дурдахад, Ц.Оюундарь намын генсекийн ажлаа өнөөдөр өгсөн билээ.