УИХ дахь МАХН-МҮАН-ын “Шударга ёс” эвслийн бүлэг өнөөдөр шинэ оны анхны хуралдаанаа хийж, хэлэлцсэн асуудлаараа сэтгүүлчдэд мэдээлэл хийлээ. Тус бүлэг Эвслийн бүлэг энэ удаад Засгийн газрын өргөн барьсан төсвийн тодотголын асуудлаар хэлэлцсэн байна.

Тус бүлгийн дарга Н.Батцэрэг энэ талаар ярихдаа “Төсвийг ерөнхийд нь дэмжиж байгаа. Гэхдээ дотор нь анхаарч эргэж ярилцах хэд, хэдэн асуудал байна. Тухайлбал, шүүгчийн цалин байна. Төрийн албан хаагчийн цалингийн жишиг эвдсэн асуудлыг эргэж ярих ёстой. Түүнчлэн тэтгэвэрт гарсан төрийн албан хаагчийн 36 сарын цалинтай тэнцэх хэмжээний тэтгэмж олгох асуудал байна. Энэ нь нэг талдаа салбар хоорондын буруу өрсөлдөөнд хүргэх, цөөн жил ажилчихаад төрийн албанаас гарах жишиг рүү орох магадгүй тул энэ асуудлыг цэгцлэх хэрэгтэй юм. Мөн төрийн захиргааны байгууллагуудад өөрчлөлт хийж байгаа. Жишээ нь, Удирдлагын хөгжлийн институт, Авто тээврийн газар зэргийг Засгийн газрын бүтцээс гаргаж байгаа юм байна. Эдгээр байгууллагуудтай холбоотой  тооцоо судалгаагаа сайн гаргаж ир гэсэн үүргийг манай бүлгээс өгсөн. Удирдлагын хөгжлийн институт гэхэд шууд аж ахуйн нэгжийн тооцоон дээр ажиллах бололцоо  байгаа юм уу. Тэнд ажиллагсдын нийгмийн даатгалын шимтгэл, цалин хөлсийг яаж тооцох юм. Шууд орлого бүрдэх боломж байгаа юу. Барилга байшингийн урсгал зардлаа өөрсдөө даагаад явах юм уу гээд олон асуудал яригдана. Тооцоо судалгаа сайн хийх ёстой" гэлээ.

Эдгээр асуудлуудаас гадна хүүхдийн мөнгөний асуудал дээр зорилтот бүлгийн тооцоог сайн гаргах ёстой гэж тус бүлэг үзжээ. Хотын айл өрхүүд болон хөдөө орон нутгийн гэр бүлийн орлого ямар байгааг нарийн тооцоолох ёстой. Хамгийн гол нь орон сууцанд амьдардаг, машинтай, орлого нь боломжийн өрхийн хүүхдэд хүүхдийн мөнгө өгөхгүй гэдэг нэгдсэн байр суурин дээр байгаа гэж тэрбээр хэллээ.

Мөн тэрбээр "Засгийн газраас орон нутгийн иргэдийн хурлуудад малын хөлийн татвар хураах эрхийг олгох гэж байна. Орон нутгийн иргэдийн хурал татвар хурааж болох боловч малчидтайгаа харилцан ярилцаж, зөвшилцөж энэ асуудлыг шийдвэрлэх ёстой" гэв.

Тус бүлэг мөн Өргөдлийн байнгын хорооны даргад нэр дэвшээд буй О.Баасанхүүгийн асуудлаар мэдээлэл хийлээ. Тус байнгын хорооны даргыг томилоогүй байсаар 2015 онтой золгосон. Харин энэ талаар бүлгийн дарга Н.Батцэрэг "Манай бүлгээс О.Баасанхүүг Өргөдлийн байнгын хорооны  даргад нэр дэвшүүлсэн. УИХ-ын гишүүд, намын бүлгүүд бие биендээ хүндэтгэлтэй хандах хэрэгтэй.  Нэг нэгнийхээ нэр дэвшүүлсэн хүнийг хүндэлж, Өргөдлийн байнгын хорооны даргыг энэ долоо хоногт томилж өгнө гэдэгт итгэж байна” гэлээ.