Ч.Сайханбилэгийн Засгийн газрын хувь заяа улам л явуургүй болж байна. Засаг хамтран байгуулсан АН, МАН хоёр тийшээгээ хараад суучихлаа. Учир нь 2015 оны төсвийн тодотгол АН, МАН-ын дундуур төмөр хөшиг татлаа. Ч.Сайханбилэгийн Засгийн газар асар их хэмжээний өр зээл авах хуулийн төсөл өргөн барив. Түүнийг нь МАН дэмжиж чадахгүй гэж гүрийв. Ч.Сайханбилэг "Та бүхэн Засаг хамтран байгуулсан юм бол миний бодлогыг дэмжих ёстой" гэж МАН-д тулгасан байна. Харин МАН-ынхан "уучлаарай. Бид өр нэмнэ гэж хамтраагүй. Хамтран ажиллах гэрээнд өрийн босгыг нэмэхгүй гэж тусгасан. Тэгэхээр бид гэрээгээ биелүүлж байна. Гэрээнд өр нэмнэ гэсэн бол дэмжих байсан. Хэрэв өр нэмэхийг дэмж гэвэл бид Засгийн газраас чинь гарна" гэж шуудхан хэлсэн байна. Ингээд төр гацаанд орлоо.Өнгөрсөн оны төгсгөлд АН, МАН хоёр хамтарч Засгийн газар байгуулахдаа хамтран ажиллах гэрээ гэж байгуулсан. Уг гэрээнд нь өрийн босгыг нэмэхгүй гэсэн заалтыг оруулжээ. Тэгээд МАН-ын дарга М.Энхболд Бага хурлын гишүүддээ илтгэл тавьж, хамтрах шийдвэр гаргуулахдаа өрийн босгыг нэмэхгүй гээд хэлчихжээ. Бага хурлын гишүүдийнхээ өмнө ингэж амласан намын дарга байр сууринаасаа буцна гэхэд хэцүү л дээ. Мөн МАН-ын бүлгийн дарга С.Бямбацогт өмнө олон удаа өрийг замбараагүй тооцоогүй зарцуулж байна. Хяналт алга. Ийм байхад өр аваад нэмэргүй гэж учирлаж ирсэн. Өчигдөр хэвлэлийн бага хурал хийхдээ "Шийдлийн Засгийн газрыг байгуулах үед МАН болон АН хамтран ажиллах гэрээ байгуулсан. Гэрээнд өрийн таазыг нэмэгдүүлэхгүй гэж тусгасан. ГэтэлЕрөнхий сайд Ч.Сайханбилэг гэрээний заалтыг зөрчиж өрийн босгыг 70 хувьд хүргэх төсвийг оруулж ирлээ. Үүнийг МАН-ын бүлэг дэмжихгүй. Цаашид ч өр нэмэхгүй гэсэн байр сууриндаа байна" гэж мэдэгдэв. Эндээс харвал МАН-ын удирдлагууд ч, бүлгийн гишүүд нь ч өрийн таазыг нэмэхгүй гэж хатуу шийджээ.
Ч.Сайханбилэгийн Засгийн газрын өргөн барьсан төслөөр өрийн таазыг ДНБ-ний 70 хувьд хүргэнэ гэжээ. 2014 оны 12 сарын сүүлийн байдлаар Монгол Улсын өр ДНБ-ний 55 хувьтай тэнцэж байгаа. Тэгэхээр Ч.Сайханбилэгийн Засгийн газар дахин 3.5 их наяд төгрөгийн өр авахаар төлөвлөсөн гэсэн үг. Ийм их хэмжээний мөнгийг юунд зарцуулах вэ? гэсэн төлөвлөгөө бас л байхгүй. "Чингис" бондын 1.5 тэрбум ам.долларын зээлийг авсаныхаа дараа юунд зарцуулахаа тооцоолоогүй байсан. Эцэстээ 888 төсөл гээд замарсан. Ч.Сайханбилэгийн авах гээд байгаа 3.5 их наяд төгрөгийн өр зээлийн хувь заяа ч иймэрхүү л замаар орж мэднэ. Гэвч МАН-ынхан ийм их хэмжээний зээл аваад эцэстээ төлж чадахгүй. Өмнөх зээлийнхээ мөнгийг эргүүлэн төлөх сан байгуулах ёстой. Тэгэхгүй бол дийлэхгүй гэж бухимдаж байна.
Ийнхүү Шийдлийн Засгийн газрыг хамтран байгуулсан хоёр намын эсрэг тэсрэг байр суурь улс төрийг тогтворгүй болгож эхлэв. Ч.Сайханбилэг өр зээл авахгүйгээр өөрийнх нь Засгийн газар юу ч хийж чадахгүй гэж үзэх болов. Харин МАН-ынхан "бид өрийг нэмэх гэж засагт ороогүй" гэж хөндөлсөв. Энэ асуудлыг хэрхэн шийдвэрлэхээс Ч.Сайханбилэгийн Засгийн газрын нас хэмжигдэнэ. Ч.Сайханбилэгт амласаныхаа дагуу гэрээгээ биелүүлж өр нэмэх хуулийн төслөөсөө татгалзах. Эсвэл МАН-ыг Засгийн газраас хөөж гаргаад өр нэмж авах гэсэн хоёр сонголт байна. МАН-ын зөвшөөрөлгүй өр нэмнэ гэдэг бараг боломжгүй. Гэхдээ сонголтыг Ч.Сайханбилэг хийх хэрэгтэй боллоо.
Сэтгэгдэл (21)