УИХ-ын гишүүн О.Баасанхүү мэдээлэл хийж 2015 оны Төсвийн тодотгол болон Төрийн тусгай албан хаагчдын эмнэлгийн талаар байр сууриа илэрхийллээ. 905 тэрбум төгрөгийн төсвийн алдагдлийг нөхөхийн тулд цомхотгол явуулж иргэдэд олгодог халамжийн мөнгүүдийг танахаар болсон. Тухайлбал, төрийн албан хаагчдын тоог 1500-аар бууруулж, одонтой ээжүүдийн мөнгө болон хүүхдийн мөнгийг ялгавартай өгч байж дээрх алдагдлыг нөхөхөөр байгаа юм. Харин  О.Баасанхүү гишүүн үүнийг зарчимгүй үйлдэл гээд “Том төрөөс тэнэг төр рүү” шилжиж байгаа алхам гэж тодорхойлов.

Тэрбээр энэ талаар “Бондын 1.5 тэрбумын төгрөгийн зарцуулалтаас 205 сая долларыг үргүй зарсан гэсэн мэдээлэл байгаа. Бондын зарцуулалтыг холбогдох байгууллагууд нь нэн даруй шалгах ёстой. Түүнээс гадна одонтой ээжүүд болон хүүхдийн мөнгөнөөс таналт хийнэ гэж байхын оронд оюутнууддаа өгдөг 70 мянган төгрөгөөс хэмнэлт хийх хэрэгтэй. Мөн иргэд Тавантолгойгоос хувьцаагаа нэхэх ёстой. Тэгэж байж хувьцааныхаа үр ашгийг хүртэнэ” гэсэн юм.

Мөн Төрийн ордны дэргэдэх эмнэлгийн барилгыг зориулалтын дагуу ашиглахыг судлах нэрийдлээр их хэмжээний мөнгө улсаас авах гэснийг буруутгалаа.  Эмнэлгийн байрыг барихад 20-40 тэрбум төгрөг ордог байна. Харин засч янзлахад 3-4  тэрбум төгрөг хэрэглэдэг аж. Тэгэхээр энэ барилгыг эмнэлгийн зориулалттай болгож засахад их хэмжээний мөнгө орохгүй юм. Үүнээс гадна Төсөв улайсан гэдэг нэрийдлээр тус эмнэлгийг засах мөнгийг төсөвлөхгүй байна. Тиймээс тус барилгыг эмнэлгийн зориулалтаар тохижуулж, ашиглалтад оруулахад шаардагдах зардал төсвийг Монгол Улсын 2015 оны төсөвт оруулах асуудлыг Засгийн газраас өргөн барих ёстой. Энэ шаардлагыг өнөөдөр Ерөнхий сайдад өргөн барина гэж тэрбээр хэллээ.

Уг асуудлаар түүнээс зарим зүйлийг тодрууллаа.

-          Ерөнхий сайд уг эмнэлгийг зориулалтын дагуу ашиглахыг дэмжиж буйгаа илэрхийлсэн үү? 

-          Судалгаа хийж байна гэсэн. Судалгаа хийж байгаа мөртлөө өнөөдрийг хүртэл асуудлыг оруулж ирэхгүй байна. 2015 оны төсвийн тодотголд уг эмнэлгийг засах мөнгийг тусгаж өгөх ёстой. Хэрвээ төсөв нь шийдэгдчихвэл 2 сарын дараа нэгдүгээр палат ашиглалтад орох боломжтой.

-         Тус барилгыг янз бүрээр өөрчилсөн. Тэр бүрд хичнээн төгрөг зарцуулсан байдаг юм бол. Одоо тус барилга дотор ямар багаж, тоног төхөөрөмжүүд байгаа вэ?

-        Би Хууль зүйн сайд Д.Дорлигжавт албан бичиг явуулсан. Ингэхдээ зарцуулсан мөнгөний асуудлаар аудитын шалгалт оруулаач гэсэн. Учир нь 2012-2013 оны төсөвт тус барилгын зориулалтыг нь өөрчлөх бус барилгын ажлыг дуусгах төсөв л батлагдсан байдаг. Тэгэхээр Засгийн газрын тогтоолыг ашиглаад өнөөдөр төсвийн ерөнхийлөн захирагч өөрөө дур мэдэн тодорхой хэмжээний мөнгө гаргаад энэ барилгад шорон босгосон. Мөн өрөө, тасалгаануудыг өөрчилсөн. Аудитын дүгнэлт гарангуут би дараа, дараагийн албан тушаалтанд нь хариуцлага тооцуулахаар явна.

-        Хүүхдийн эмнэлэг болгох сураг байгаа. Энэ талаар таньд мэдээлэл байна уу?

-       Энэ эмнэлэг нь Монгол улсын клиникийн төв эмнэлэг байх ёстой. Жилдээ 20-25 мянган хүн ажиллах том лаборторитай байх зориулалттай. Жилдээ 250 000 хүн хэвтэж эмчлүүлэх бололцоотой байх ёстой. Тэгэхээр үүнд шүд, дотор эрхтэн, хүүхдийн кабенит ч байх ёстой.