УИХ-ын чуулганы хуралдаан үргэлжилж байна. Хуралдаанаар Ерөнхий сайд Ч.Сайханбилэг 2015 оны төсвийн тодотголыг танилцуулж байна. Тэрээр төсвийн орлого нэг их наяд төгрөгөөр дутсаныг зарлагыг бууруулах, эсвэл орлогыг нэмэгдүүлэх замаар төсвийг тэнцвэржүүлэх шаардлагатай гэлээ.

Хэлэлцэж буй асуудалтай холбогдуулан гишүүд асуулт асууж байна. Тухайлбал, Ц.Нямдорж “АН, МАН-ын хооронд хийсэн санамж бичигт гадаад өрийг одоо байгаа хязгаараас нь нэмэгдүүлэхгүй” гэж заасан. Тухайн үеэд гадаад өрийн хэмжээ ДНБ-ийн 49 хувьтай байна гэж танилцуулж байсан. Гэтэл өнөөдөр энэ хувийг 70 хувьд хүргэнэ гэж байна. Тохиролцооноос ухарвал МАН нь засгаас гарах чиглэлтэй шүү. Ийм баримт бичиг байсаар байтал гэрээний заалтыг зөрчсөн төсөв оруулж ирж байгаа юм” гэв.

Үүнд, Ерөнхий сайд Ч.Сайханбилэг “Хамтарсан засгийн газар байгуулах хугацаанд намын бүлгүүдийн хооронд хийсэн баримт бичиг, протоколийг үзсэн. Өрийн хэмжээний асуудлыг нэлээд нухацтай ярьсан. Хэсэг хугацааны дараа суурь заалтыг хангахын төлөө намууд хамтран ажиллана гэж үзсэн. Өрийн хэмжээг заасан хуулийн үндсэн суурь заалтыг хөдөлгөхгүйгээр энэ заалтыг хангахын тулд тодорхой хугацаанд ажиллах ёстой. Өрийн хязгаарыг 70 хувьд аваачсан ч бодлогын дүнд эргээд буух арга зам бий” гэв.

Мөн Сангийн сайд Ж.Эрдэнэбат “Өрийн босго давсан хувь цаашид ч өсөх магадлалтай байна. Өрийн босгын асуудалд хоёр намын хооронд гэрээг ойлгож байгаа ч одоо үүсээд буй нөхцөл байдлыг бодолцон зөв шийдэл гаргах нь зүйтэй” гэсэн байв.