Монголын оюутны холбооны удирдлагууд өнөөдөр мэдээлэл хийж оюутнуудад өгдөг 70 мянган төгрөгөөс хэмнэлт хийн төрсөн ээжүүдийн мөнгөнд нэмэрлэхийг уриалсан.

Оюутнуудад 100 гаруй тэрбум төгрөгийг өгдөг. Харин одооноос эхлэн сайн сурсанд нь тэтгэмж олгож үлдсэн зөрүү мөнгийг эхчүүдийн мөнгөнд тусгахыг тэд уриалж уриалгаа Ерөнхий сайдад танилцууллаа.

Уриалгад:
 

1.    Магистр болон докторын шатлалын сургалтанд суралцаж буй суралцагчдад үндэсний болон урамшууллын тэтгэлэг олгож байгааг зогсоох.

2.    Сурлагын голчийг 2.0 үнэлгээгээр тооцон олгож байгаа журмыг өөрчлөн 3.0 голч онооноос дээш үнэлгээтэй суралцаж буй оюутан суралцагчдад тэтгэлэг олгох.

3.    Сургалтын байгууллагын чанарын түвшинг харгалзах, тавигдах шаардлагыг нэмэгдүүлэх чиглэлээр журмыг шинэчлэн найруулах.

4.    Голч үнэлгээнээс гадна тухайн оюутны амьжиргааны түвшин, гэр бүлийн байдал, хөгжлийн бэрхшээлтэй оюутан, орон нутагт суралцагчид, нийгмийн идэвх буюу олон нийтийн үйл ажиллагаанд оролцсон байдал зэргийг харгалзан тэтгэлэг олгох журамд өөрчлөлт оруулах гэжээ.

Үндэсний болон урамшууллын тэтгэлгээс хэмнэсэн мөнгөний тодорхой хувийг оюутан суралцагчдад чиглэсэн бүтээн байгуулалт, оюутны номын сан, дотуур байр барих, дэлхийн тэргүүлэх чиглэлийн сургуулиудаас эрдэмтэн багш нарыг урьж ажиллуулахад зарцуулах саналыг Монголын Оюутны холбооны удирдлагууд Ерөнхий сайдтай уулзахдаа хэлж байлаа.