Чуулганы нэгдсэн хуралдаанаар Төсвийн хүрээний мэдэгдлийг хэлэлцэж байна.

Хэлэлцэж буй асуудалтай холбогдуулан УИХ-ын гишүүд асуулт асууж, санал хэллээ.

Тухайлбал, УИХ-ын гишүүн Ж.Батзандан боловсрол, эрүүл мэндийн салбар, эхчүүд, хүүхдэд зориулсан мөнгийг хасмааргүй байна гэлээ. Түүнчлэн эрхэм гишүүн зардлыг хасах замаар хямралаас гарахгүй, харин эдийн засгийн бүтцийг өөрчлөх замаар гардаг гээд европын орнууд ажлын байрыг танаж биш, хадгалж байж хямралаас гарсан туршлага бий гэж сануулж байлаа.

Харин УИХ-ын гишүүн Л.Энх-Амгалан “2016 онд зээлийн эргэн төлөлтүүд эхэлнэ. 2017 оноос бондын эргэн төлөлтүүд эхэлнэ. Энэ бүхнийг тооцсон, эдийн засгийн өсөлтийг ямар бодлого хөтөлбөрөөр хангах нь тодорхой бус байна. Инфляцийн түвшинг ирэх гурван жилд 7 хувь байна гэж байгаа нь ямар үндэслэл тооцоон дээр суурилсан юм бэ” гэв. Үүнд Сангийн сайд Ж.Эрдэнэбат “Уул уурхайн бүтээгдэхүүний үнэ ханш сүүлийн үед унаж байгаа. Иймд эдийн засгийн өсөлтөө хэт өөдрөг төсөөлөөгүй. Үйлдвэрлэл үйлчилгээ сэргээд ирвэл үүнээс доош бууж ч болно” гэсэн юм.

Мөн Ч.Хүрэлбаатар гишүүн өрийн босгыг нэмж буй асуудлыг шүүмжилж, зарцуулалт нь тодорхойгүй байгааг дурдаад  “Бид Чингис бондын бүх гэрээг авч үзмээр байна. Яг юунд яаж зарцуулж байгаа гэдгийг тодорхой болгосны дараа дахин өр зээл авах асуудлаа шийдмээр байна” гэв.

Үүнтэй холбоотойгоор УИХ-ын дарга З.Энхболд “Монголбанкны үйл ажиллагааг шалгах ажлын хэсэг, Хөгжлийн банкны Чингис бондыг шалгах ажлын хэсэг байгуулах нь зүйтэй” хэмээн дэмжсэн байв. Гэхдээ энэ ажлын хэсгийг байгуулахыг холбогдох байнгын хороодын ажил хэмээсэн юм.

Сангийн сайд Ж.Эрдэнэбат үүнд “өнөөдрийн өрийн хэмжээ маань ДНБ-ий 55 хувьтай байгаа. ДНБ-ий хэмжээ 26,1 их наяд байна.Өрийн босго 70 хувьд хүргэх асуудлыг Засгийн газрын хуралдаанаар шийдэгдсэн. Энэ дагуу нь оруулж ирж байгаа” гэв. Мөн “Бонд улсын өрөнд нэмэгдэж байгаа. Чингис бондоос 700 тэрбумийн үлдэгдэл бий. Үүнээс хийх ажил нь тодорхой болчихсон” гэдгийг тодотгосон байна.

Чуулганы хуралдаан үргэлжилж байна.