Монгол Улсын Ерөнхийлөгч Ц.Элбэгдорж өнөөдөр чуулганы хуралдаанд хийсэн мэдээлэллийн эхэнд өнгөрсөн онд манай улсад хийсэн бүтээн байгуулалт, ажил хөдөлмөрийн талаар товч танилцуулсан юм. Ингэхдээ өнгөрсөн онд манай улс хэдий эдийн засгийн хүнд нөхцөл байдалд байсан хэдий ч түүхий эдээ боловсруулж бүтээгдэхүүн болгож байгаа гэдгийг онцоллоо.Мөн хоёр хөрш орнуудтай хийсэн айлчлалын үр дүн нь эхнээсээ гарч байгааг хэлээд гурван орны өндөр дээд түвшний уулзалтыг анх удаа манай улсын санаачилгаар хийсэн гэдгийг тодотголоо. Түүнчлэн нийт ард иргэддээ өнгөрсөн онд хийж бүтээсэн ажил хөдөлмөрөө үргэлжлүүлж илүү ихийг бүтээхийг уриалсан юм.
“Монголдоо хийж бүтээж, үйлдвэрлэж болох итгэл манай бизнес эрхлэгчдэд бий болж байна. Баялагаа бүтэн боловсруулж чадвал хямралд бага өртлөг. Өөрсдөө үйлдвэрлэж, боловсруулж чадвал хөгждөг. Хоёр хөршийн харилцаа сэргэж байна. Төрийн тэргүүний айлчлалын үр дүнг баталгаажуулж хийх ажил их байна. Мөн гурван улсын төрийн тэргүүний уулзалтыг хийлээ. Ийнхүү өндөр дээд түвшний уулзалтууд цаашид үргэлжилнэ. Хоёр хөрштэйгээ хамтран ажиллах, ахиц дэвшил авчрах ховорхон боломж юм. Ирэх 2016 онд Ази, Европын төр засгийн тэргүүнүүдийг хүлээн авах бэлтгэл ажилдаа ороод байна. Улс орныхоо нэрийг сайнаар гаргах эрхэм үйлсэд хчиээн зүтгэсэн албаны хүмүүст талархал илэрхийлье. Хүмүүс амьдралдаа ахиц дэвшил гаргахын тулд цаг наргүй ажиллаж байна. Монгол Улс хөгжин дэвжинэ гэдэгт би итгэлтэй байна. Малчид, тариаланчид, нийт бүтээгчиддээ улам их амжилтыг хүсье” гэлээ. Түүнчлэн УИХ-ын гишүүдэд хандан “Бид Монголын зовлонг нимгэлэх болохоос нэмэх ёсгүй. Ийм байдлыг харсан ч хараагүй юм шиг өөгшүүлж болохгүй. УИХ-ын ээлжит сонгууль болж, та бүхэн тангарагаа өргөж байсан нь саяхан мэт санагдаж байна. Бид хичнээн олон шийдвэрээсээ эргэж буцав. Улс орноо хохироож болохгүй. Найман хувийн зээл авсан хүн ажил таслах нь байтугай яаж ажил нэмж олж олох вэ гэж хайдаг болж байна. Иргэд хариуцлагатай болж байна. Харин бид одоо хариуцлагатай болъё” гэсэн юм.
Тэрбээр гишүүдэд ажилдаа хариуцлагатай байхыг маш хатуу санууллаа. Мөн “Бүсээ дээрээсээ эхэлж чангалъя. Өрхийг дээрээс нь татдаг. Надаас эхлээд төсвөө танъя. Би зарим сайд нарт хэлж байгаа. Албан тушаалтнуудынхаа өрөөг зохицуулахаас эхлээд тансаглалаа тана гэж. Албан тушаал, сандал суудлын тансаглалаа хас. Засаг нь чадахгүй бол УИХ нь хас. УИХ нь чадахгүй бол Засаг нь хас. Хоёулаа чадахгүй бол иргэдээр хасуул” гэлээ.
Чуулганы хуралдаан ерөнхийлөгчийн үгээр үргэлжилж байна.
Т.Энхэлээ
Сэтгэгдэл (11)