210 сая төгрөгний төлөө БНХАУ-ын иргэдийн аминд хүрсэн хэрэг олны анхаарлыг татаж байна. Тодруулбал, энэ сарын 11-ний  23.40 цагийн орчимд Баянгол дүүргийн хоёрдугаар хорооны...... дугаар байрнаас хоёр хүний цогцос олдсон харамсалтай хэрэг гарсан юм. Амиа алдсан иргэдийн хувьд БНХАУ-ын иргэд байсан нь шинжээчдийн дүгнэлтээр тогтоогдоод байна. Талийгаачид манай улсад бизнес эрхэлдэг мөнгөтэй хүмүүс байсныг эх сурвалж мэдээллээ. Харин энэ хэрэгт сэжиглэгдэж байгаа этгээд Г гэгчийн хувьд гурван ч иргэнтэй бүлэглэн уг хэргийг үйлдсэн байж болзошгүй байгаа юм. Тэрбээр хэргийг үйлдсэнийхээ дараа оргон зайлах төлөвлөгөөтэй Дарханы замд явж байгаад баригдсан юм.

Харин Дархан, Сэлэнгэ аймгийн цагдаагийн хэлтсийнхэн Улаанбаатар хотын цагдаа, Баянгол дүүргийн нэгдүгээр хэлтсийн алба хаагчид нягт холбоотой, мэргэжлийн түвшинд сайн ажилласнаар уг этгээдүүдийг цаг алдалгүй шуурхай илрүүлж баривчилжээ.

Ер нь манай цагдаагийн байгууллагын алба хаагчид аливаа хэргийг шуурхай илрүүлж байгаа нь иргэдийн талархалыг хүлээгээд байгаа. Магадгүй дээрх хэргийн сэжигтнүүдийг олж тогтоогоогүй байсан бол бизнес хийж байсан хоёр хятад иргэн манай улсад алагдсан явдал нь хоёр улсын дипломат харилцаанд сэв суулгахаар байж ч болзошгүй юм. Гэвч цагдаагийн байгууллагынхан амралтын өдөр гэдгийг үл харгалзан дуудлагын дагуу шуурхай ажиллаж, хэргийн газрын нотлох баримтыг үндэслэн ажилласнаар хэрэгтнүүдийг оргон зайлахаас урьтаж илрүүлж чадсан юм. Иймд цагдаа нарын ур чадвар, хоорондоо нягт холбоотой ажиллах байдал нь улам сайжирч байгааг дээрх хэргээс тод томруун харагдаж байгааг энд цухас дурдах нь зүйн хэрэг биз ээ.