Х    акухо М.Даваажаргал Японы сүмо бөхийн түүхэн амжилтыг удахгүй эвдэх гэж байна. Тэр торгон мөчийг дэргэдээс нь үзэхээр Монголын 300 иргэн энэ сарын 23-нд Японыг зорих гэж байгаа аж. Тэдэнд сүмо бөхийн барилдаан үзүүлж, тус орноор аялуулах болон аваргуудын бэлтгэлийн явцтай танилцуулах гэх мэт олон сонирхолтой ажлыг Монголын сүмо бөхийн холбооны тэргүүн Кёкүшюзан Д.Батбаяр зохион байгуулж байгаа юм байна. Тэрбээр өөрийнхөө зардлаар ихэнх хүмүүсийг нь авч яваа гэх мэдээлэл хэвлэлүүдээр гарч буй. Ингээд түүнтэй зарим асуудлаар ярилцлаа.

-   Таныг Япон руу 300 хүн авч явж тус оронтой танилцуулах аяллыг зохион байгуулж байгаа гэх мэдээлэл байна. Мөн дээрх хүмүүсийг Хацу Башёгийн сүүлийн өдрийн барилдаан үзүүлнэ гэсэн. Энэ талаар мэдээлэл өгнө үү?

-    Энэ сарын 23-ны өдөр Японы шууд нислэгээр 300 гаруй хүн явах гэж байна. Онгоцны суудал дүүрчихсэн. Мөн сүмо үзэх үзэгчдийн тоо нь хэтрээд билет нь олдохгүй байна. Аргагүй л дээ япончууд өөрсдөө сүмо бөхөө их үздэг учраас билетээ аль хэдийн захиалаад дуусчихаж. Тэгэхээр бидэнтэй хамт явахаар сүүлд бүртгүүлсэн хүмүүс сүмо үзэх боломжгүй л болоод байх шиг байна. Гэхдээ миний авч явж байгаа хүмүүс биш л дээ. Жишээ нь бүх аймгийн дарга нар өөрсдийнхөө зардлаар явж байгаа. Тэдэнд билет олдохгүй болчих шиг боллоо. Аймгийн дарга нар тэнд хуралд оролцох юм. Я.Санжмятав сайд мөн Завханыхаа зарим хүүхдүүдтэй явах гэж байгаа.

-    Хакухо М.Даваажаргал аваргын түүхэн амжилтыг монголчууд олноороо хуваалцах торгон мөч болох нь дээ?

-    Сүмо бөхийн дээд амжилтыг эвдээгүй 20 гаруй жил болж байна. Тэгэхээр Японы түүхэн амжилтыг Монгол хүн эвдэх гэж байна. Жишээлбэл, Монгол бөхийн түүхэнд 10 түрүүлсэн Б.Бат-Эрдэнэ, Х.Баянмөнх зэрэг аваргын амжилтыг нэг япон залуу ирж эвдэх гэж буйтай ижил ойлголт юм.

-    Та өөрийнхөө зардлаар дээрх хүмүүсийг авч явж байгаа юм уу?

-    М.Даваажаргал аварга 80 гаруй хүний зардлыг гаргаж байгаа. Би ч мөн 50 гаруй хүний зардлыг даагаад явах гэж байна. Боломжтой зарим нь өөрсдийнхөө зардлыг гаргаад явж байна.

-    2015 он бол сонгуулийн өмнөх жил. Тэгэхээр та аль эртнээс сонгуулийн бэлтгэл ажилдаа ороод явж байх шиг байна. Тиймүү?

-   Яахав. Хүмүүс янз бүрээр л ойлгож байх шиг байна. Би өөрийнхөө хамтран зүтгэж ирсэн хүмүүсээ ингэж дэмжиж байгаа юм. Мөн намайг дэмжиж ирсэн хүмүүсээ авч явж байгаа. Хамгийн чухал нь Хакухо дүүгээ дэмжих байна.

-    Та 2016 оны сонгуульд нэр дэвших үү?

-    Мэдэхгүй. Нэр дэвшүүлэх үгүй нам л мэднэ дээ.

-    Монголын бөхчүүд сүмод амжилт гаргах тусам дарж, хавчиж байна гэх мэдээлэл байдаг. Ер нь энэ хэр бодитой мэдээлэл вэ. Таньд энэ талаар монгол бөхчүүд аминчлан хэлж, ярьж байсан зүйл байна уу?

-   Намайг барилдаж байх үеэс ийм яриа байсан. Энэ бол худал мэдээлэл. Ер нь Япончууд биднийг дэмжиж байсан уу гэхээс дарж, доромжилж байсан зүйл байхгүй. Монгол бөхөд япон хүн барилдаад амжилт гаргаад байвал монголчууд их уурлана. Харин япончууд бол биднээс их өөр. Хувь хүн хөдөлмөрлөж зүтгээд амжилтанд хүрвэл тэд дэмждэг. Угаас тийм сэтгэхүйтэй хүмүүс юм. Монгол бөхчүүд харин ч их дэмжигчидтэй байдаг.

-    Японы сүмо бөхөд дахин сайн монгол бөх гаргахын тулд ямар ажлуудыг хийж байна?

-   Япон руу бөхчүүд тасралтгүй очсоор байна. Манай эмэгтэй бөхчүүд их сайн барилдаж байгаа. Эрчүүдээсээ илүү барилдаж байна шүү дээ. Мах иддэг болохоор их бяр хүчтэй байх шиг байна. Ирэх жил сүмо бөхийн дэлхийн аварга шалгаруулах тэмцээнийг манайх эх орондоо зохион байгуулах гэж байна.

-  Тантай уулзсаных нэг зүйлийг асуумаар байна. Шинэчлэлийн Засгийн газарт Ерөнхий сайдын зөвлөхөөр ажиллаж байсан. Одоо та ямар үүрэгт ажилтай байна?

-   Муу сурдаг хүүхэд улирдаг шиг шинэ Ерөнхий сайдын зөвлөхөөр ажиллаж байна. Ч.Сайханбилэг сайдын нийгмийн бодлого хариуцсан зөвлөхөөр ажиллаж байгаа. Үүн дээр спорт, аялал жуулчлал хариуцаж байна.

-    Шинэчлэлийн Засгийн газарт ажиллаж байсан хүний хувьд Н.Алтанхуяг сайдыг хэр сайн ажилласан гэж бодож байгаа вэ?

-    Н.Алтанхуяг сайд арай хэтэрхий сайн ажиллачихсан. Би бол хурдыг нь гүйцэхгүй байсан. Өглөө 07.00 цагт ажилдаа ирчихсэн сууж байдаг. Орой бүр 11.00 цагт харьдаг. Ганцхан өдөр амардаг. Одоо харахад бүтээн байгуулалтын ажлыг сайн хийсэн байна. Шинээр тавигдсан замуудыг л харал даа. Н.Алтанхуягийн Засгийн газар ирээдүйд хийх ажлын их сайн сууриудыг тавьж өгсөн байна. Богино хугацаанд олон ажлыг хийсэн байгааг та бүхэн нүдээрээ харж байгаа биз дээ.

Т.Энхэлээ