Хөлбөмбөгийн аварга шалгаруулах "EURO 2012" тэмцээнийг Монгол улсад дамжуулан албан ёсны эрхийг "ТВ9" телевиз аваад байна. Дэлхийд чансаагаараа эхний 16-д ордог багууд дөрвөн хэсэгт хуваагдаж, нэг сарын турш Польш, Украйны найман хотод тоглохоор болсон юм. Хүн төрөлхтний 80 хувь нь шимтэн үздэг хөлбөмбөгийн тэмцээнийг шууд дамжуулах ажиллагаандаа "ТВ9" телевиз хамтран ажиллах бизнес эрхлэгч, албан байгууллагыг нээлттэй хүлээн авч байгаа аж. Хамтран ажиллах саналыг энэ сарын 26-ны өдрийг хүртэл хүлээн авах бөгөөд 4-5 телевизэд тэмцээний албан ёсны тоймыг өгөх юм байна. Аваргын тэмцээний нээлт Польшийн нийслэл Варшав хотын төв цэнгэлдэх хүрээлэнд болох бол хаалтын ажиллагаа Украйны нийслэл Киев хотын Олимпик стадионд болох юм. Энэ удаагийн тэмцээнд Европ тивийн аваргаас гадна дэлхийн аварга Итали, ХБНГУ, Англи, Франц, Испани улсын шигшээ багууд оролцож байгаа нь Европын аваргын урьд өмнөх тэмцээнүүдээс хамгийн өндөр чансаатай байгааг мэргэжилтнүүд онцолж байна. Мөн 2010 оны Хөлбөмбөгийн ДАШТ-ний алт, мөнгө, хүрэл медальтай Испани, Голланд, Германы шалгарсан багууд бүрэн бүрэлдэхүүнээрээ орж байгаа нь хөлбөмбөгийн ДАШТ-тэй дүйцэхүйц өндөр нэр хүндтэй болжээ.
