Пакистаны өсч яваа боксчин Мохаммед Вазим “Олимпийн эрх олгох Азийн боксын тэмцээн”-д манай тамирчин Н.Төгсцогттой өнөөдөр өрсөлдөнө. Тус тэмцээн Казакстаны нийслэл Астана хотод болж байгаа юм.

    Тэд 52 кг-ын хөнгөн жинд шөвгийн наймын тоглолтод оноолт таарчээ.

    Энэ тоглолтоос бүх зүйл шийдэгдэх бөгөөд хэн ялсан нь “Лондон 2012”-ын олимпийн эрх авах юм. Учир нь Ази тивээс шөвгийн наймаас шалгарсан шилдэг дөрвөн боксчинд л олимпийн эрх олгох юм.


    Пакистанчууд Н.Төгсцогтын өрсөлдөгчид ихээхэн найдлага тавьж байна. Мохаммед Вазим шөвгийн 16-д Туркын тамирчин Зарип Жумаевыг ялснаар “Лондон 2012” олимпт оролцох зогсоолруу нэг алхмаар урагшиллаа хэмээн пакистанчууд бахархаж байна.

    Пакистаны боксын холбооны эрхлэгч Али Акбар Шах: “Вазимын байгуулсан энэ ялалт Бидэнд олимпийн найдвар болж байна” хэмээн мэдэгдсэн байна. Мөн тэрбээр “Би дараагийн тоглолтод Васимыг Монголын тамирчинг ялж олимпийн эрх авна гэдэгт итгэлтэй байна” гэжээ.

Вазим “Хамтын нөхөрлөлийн холбооны улсуудын боксын тэмцээн”-д хүрэл медаль хүртэж байсан тамирчин аж.

Манай тамирчин Н.Төгсцогт шөвгийн 16-д Энэтхэгийн тамирчин Маянбам Сингх Суранжояыг 30:10-ийн харьцаагаар ялсан байна.

    Н.Төгсцогт ДАШТ-ий мөнгө (2009), Азийн АШТ-ийн хүрэл (2009), Улсын аварга (2009), Азийн Хүүхдийн Наадмын хүрэл медальтай (2008), монголчуудын олимпийн найдвар билээ. Төгсцогттоо амжилт хүсье.