Долдугаар сарын 1-ний хэргээр шүүгдсэн цагдаагийн экс дарга нарыг өмгөөлж байсан О.Алтангэрэлийг дөнгөж сая СБД-ийн шүүхийн цагдан хорих өрөө рүү чирч орууллаа. Цагдаагийн 4840 УНЕ дугаартай фургон машинтай цагдаа нар түүнийг харгалзаж байгаа бөгөөд 14 хоног цагдан хорих шийдвэр гарчээ. Сэтгүүлчид түүнийг шүүхийн гадна бүчин авч, тодруулга авах гэсэн ч цагдаа нар боломж олгосонгүй. Өмгөөлөгч өөрөө ч үг хэлэх гэсэн ч эрхийг нь эдлүүлсэнгүй чирч гудачсаар авч орлоо.
      Энэ үеэр өмгөөлөгчдийн холбооныхон СБД-ийн шүүхийн Тамгын газрынхантай уулзалт хийн, тус байрны хоёр давхарт сууцгааж байна. Тус холбооноос 10 гаруй өмгөөлөгч ирсэн бөгөөд тал нь уулзалтад оролцож, бусад нь О.Алтангэрэлийн дэргэд байгаа юм. Гэхдээ зөвхөн О.Алтангэрэлийг хорихоор шийдвэрлэсэн бөгөөд бусад өмгөөлөгчдийг хэрхэх нь одоохондоо тодорхойгүй байна.