“Долдугаар сарын 1”-ний хэрэгт буруутгагдан, цагдан хоригдож байгаа цагдаагийн экс дарга нарын хэрэгт өмгөөлөл үзүүлж байсан дөрвөн өмгөөлөгч үйлчлүүлэгчдээсээ татгалзаад байгаа билээ.
    “Долдугаар сарын 1”-ний хэрэгт буруутгагдан, цагдан хоригдож байгаа цагдаагийн экс дарга нарын хэрэгт өмгөөлөл үзүүлж байсан дөрвөн өмгөөлөгч үйлчлүүлэгчдээсээ татгалзаад байгаа билээ. Энэ талаар Монголын өмгөөлөгчдийн холбоо /МӨХ/-ноос ажлын хэсэг гарч, өмгөөлөгчдийн эрх ашиг зөрчигдсөн эсэх  дээр дүгнэлт хийснээ өчигдөр танилцуулсан юм.
    Гэтэл уг мэдээллийн үеэр ЦЕГ-ын даргын үүрэг гүйцэтгэгч асан, хурандаа Ч.Амарболдын өмгөөлөгчөөр ажиллаж байсан өмгөөлөгч О.Алтангэрэлийг цагдан хорих шийдвэр гарсан талаарх мэдээлэл гарав. Тэрээр “Намайг хорих шийдвэр гаргасан байна. Энэ тухай дүүргийн ерөнхий шүүгч Т.Соёмбо-Эрдэнэ танилцууллаа” хэмээн холбоондоо утсаар мэдээлэл өгчээ. Мөн албан ёсны өмгөөлөгч авах хүсэлтэй байгаагаа ч илэрхийлсэн байна. Ингээд МӨХ-ныхон ямар учраас өмгөөлөгчийг хорих болсон талаар мэдээлэл авахаар Сүхбаатар дүүргийн шүүхэд ирж, дотогш нэвтрэх гэсэн боловч оруулахгүй байлаа. Өмгөөлөгчийг хорих болсонтой холбогдуулан энэ үеэр МӨХ-ноос арав гаруй өмгөөлөгчөөс гадна хэвлэлийнхэн ч нэлээд их цугларсан байв.
    Ингээд удаагүй байтал 17.30 цагийн үед О.Алтангэрэл өмгөөлөгч дүүргийн ерөнхий шүүгчийн өрөөнөөс гарч ирсэн боловч  шүүхийн хуягууд  түүнд ганц ч үг хэлэх боломж олголгүй,шүүх танхимд хорьсон юм. Үүний дараагаар төдий л удсангүй О.Алтангэрэл өмгөөлөгчийг цагдан хорих төв рүү ачсан юм.
    Тэрээр хэлэхдээ “Энэ шүүхийнхэнд буруу байхгүй. Цаана нь өөр ашиг сонирхол байгаа. Энэ бол дээрээс захиалгаар явуулж байгаа ажиллагаа. Гэхдээ шүүхийн байгууллагад итгэж, мэргэжилдээ үнэн ч явсан нь миний буруу боллоо. Энэ үйл явдал мөн л хууль бус шүү” хэмээсээр ШШГЕГ-ын харьяа урьдчилан хорих 461 дүгээр анги уруу ачигдсан юм.
    О.Алтангэрэл өмгөөлөгчийн хамтаар цагдаагийн экс дарга нарт өмгөөлөл үзүүлж байсан Л.Өлзийхүү болон Д.Энхтунгалаг нарын өмгөөлөгчид энэ үеэр мөн ирсэн байсан юм. Ямар учраас ганц О.Алтангэрэл өмгөөлөгчийг хорих болсон талаар тэднээс тодруулахад “Бид ч мэдээгүй байна. Эхлээд О.Алтангэрэлийг дараа нь биднийг ч хорихгүй гэх баталгаа алга. Үнэхээр ойлгомжгүй байдалд үүсээд байна. Шүүхээс энэ мэтээр удаа дараа хууль буй үйлдэл гаргаад байгаа болохоор л бид өмгөөлөл үзүүлэхээс татгалзсан юм шүү дээ” хэмээн учирлаж байлаа.  
    Гуравдугаар сарын 28-нд болсон шүүх хурлаар өмгөөлөгчид шүүгдэгчдээсээ татгалзан шүүх хурлыг орхин гарсан учраас хариуцлага тооцох болсон талаар  Сүхбаатар дүүргийн шүүхээс өчигдөр 14.00 цагийн үед О.Алтангэрэлд утсаар мэдэгдэж, дуудсан ажээ. Үүний дагуу Л.Өлзийхүү өмгөөлөгч О.Алтангэрэлийн хамтаар очсон байна.  Дүүргийн ерөнхий шүүгч тэдэнд хэлэхдээ “Өмгөөлөгчдийн гаргасан үйлдэл хууль бус. Тийм учраас та бүхэнд хариуцлага тооцохоор боллоо” хэмээн хэлжээ.
    Харин үүний дараагаар Л.Өлзийхүү өмгөөлөгчийг гаргаж, О.Алтангэрэлийг авч үлдсэн байна. Улмаар энэ үеэр түүнийг хорих болсон шалтгаанаа тайлбарласан ажээ. Өмгөөлөгчдийн ярьж буйгаар шүүхийнхний хийж буй энэ үйлдэл нь цаанаасаа нарийн зохион байгуулалттай байсан гэдгийг хэлж байсан юм. Учир нь тэд О.Алтангэрэл өмгөөлөгчийг цагдан хорих болсноо эрт мэдэгдсэн хэрнээ цаасан дээр буусан захирамжаа гардуулалгүй  нэлээд удсан юм.
    Ингээд 18.00 цагтай зэрэгцэн уг захирамжийг О.Алтангэрэлийн өмгөөлөгч Н.Даваад гардуулсан юм. Өмгөөлөгчид хэлэхдээ захирамжаа гардаж аваад гомдол гаргана гэцгээж байсан юм. Гэвч тэдний энэ хүсэл “талаар болсон”. Учир нь өмгөөлөгч гомдол гаргах гэсэн боловч Сүхбаатар дүүргийн шүүх “ажлын цаг дууссан” гэдэг шалтгаанаар өмгөөлөгчдийн гомдлыг хүлээж авалгүй бөгөөд О.Алтангэрэлийг цагдан хорих төв рүү ачив.
    Хуулиараа бол хорих шийдвэр гарсны дараа буюу тухайн хүний өмгөөлөгч цагдан хорих тухай шүүхийн захирамжийг гардаж авсан даруйдаа гомдол гаргасан тохиолдолд хэргийг түдгэлзүүлдэг байна. Гэтэл “хашир шүүгч”-ид энэ хуулийн заалтыг яаж хүчингүй болгохоо эртнээс төлөвлөсөн бололтой. Цагдан хорихоор болсон гэдгээ аль эрт дуудаж, мэдэгдсэн атлаа шүүхийн захирамж гаргаж өгөлгүй байсаар “ажлын цаг дууссан” хэмээн хаалгаа барьж байгаа үйлдлээс нь илт байлаа.
     МӨХ-ноос ирсэн маш олон өмгөөлөгч толгой сэгсрэн, “Хууль шүүхээс гарч байгаагүй үйл явдлууд цагдаагийн экс дарга нарын хэрэгтэй холбоотойгоор гарч байна. Хууль ёсны эрхээ эдлэн иргэнд өмгөөлөл үзүүлснийхээ төлөө өмгөөлөгч цагдан хоригдож байгаа анхны тохиолдол энэ боллоо” хэмээж байв.